Qazaqstanda quny $46 trln asatyn 5 myńnan astam barlanbaǵan ken oryn bar – Prezıdent
RIM. KAZINFORM – Memleket basshysy Qasym-Jomart Toqaev «Qazaqstan-Italııa» ınvestıtsııalyq dóńgelek ústeli barysynda jańartylatyn energııa salasyndaǵy yntymaqtastyqtyń keleshegi týraly aıta kele, Qazaqstan óńirde birinshi bolyp Parıj kelisimin ratıfıkatsııalaǵan memleket retinde 2060 jylǵa qaraı kómirtegi beıtaraptyǵyna qol jetkizý jóninde mindetteme alǵanyn atap ótti. Bul týraly Aqordanyń baspasóz qyzmetinen málim etti.
«Bizdiń jańartylatyn energııa salasyndaǵy áleýetimiz 1 trıllıon kVt/saǵ dep baǵalanady. Oǵan Frantsııanyń Total, Saýd Arabııasynyń ACWA Power, Birikken Arab Ámirlikteriniń Masdar jáne Germanııa men Shvetsııanyń Svevind Energy Group sııaqty iri jahandyq kompanııalary qyzyǵýshylyq tanytty. Bul kompanııalar qýaty 43 GVt bolatyn jańartylatyn energııany óndirý jónindegi jobalardy júzege asyrýǵa nıetti. Italııada elektr energııasynyń úshten biri «jasyl energetıka» kózderi esebinen óndiriletini belgili. Osy tájirıbeni eskersek, ıtalııalyq kompanııalar da atalǵan jobalardy iske asyrýǵa nıet bildirgen kásiporyndardyń qataryna qosyla alady. Biz bul mańyzdy saladaǵy áriptestikti, meıli ol óndiris, tehnologııa transferti nemese tájirıbe almasý bolsyn, damytýǵa asa múddelimiz», – dedi Qasym-Jomart Toqaev.
Memleket basshysy tehnologııalyq revolıýtsııany jáne aldaǵy ýaqytta asa mańyzdy shıkizatty óndirý jáne óńdeý salasynda jahandyq suranystyń eselep ósetini jónindegi boljamdy eskerip, Italııa kásipkerlerin osy baǵytta yntymaqtastyq ornatýǵa shaqyrdy.
«Dúnıejúzilik banktiń baǵalaýynsha, Qazaqstanda quny 46 trıllıon dollardan asatyn bes myńnan astam barlanbaǵan ken orny bar. Búginde biz Eýropa odaǵyna múshe elderdiń ekonomıkasyna qajetti eń mańyzdy 34 shıkizattyń 19 túrin óndiremiz. Qajetti ınvestıtsııa bolsa, kobalt, volfram, lıtıı sııaqty paıdaly qazbalardyń 9 túrin ıgerýge bolady», – dedi Qazaqstan Prezıdenti.
