Qazaqstanda quny 3 trln teńgeden asatyn 1300 MJÁ kelisimi jasaldy
ASTANA. KAZINFORM — Qazaqstanda memlekettik-jekemenshik áriptestik (MJÁ) aıasynda jalpy quny 3 trln teńgeden asatyn 1300 kelisim jasalǵan. Bul týraly Qazaqstandaǵy memlekettik-jekeshelik áriptestikti damytýǵa arnalǵan halyqaralyq ınvestıtsııalyq dıalogta Qazaqstandyq MJÁ ortalyǵy basqarma tóraǵasynyń birinshi orynbasary Aıdos Kóbetov málimdedi.
Onyń aıtýynsha, ınvestıtsııalyq bloktyń negizgi maqsaty — Qazaqstan zańnamasynyń iri kapıtaldy qajet etetin jobalardy júzege asyrýǵa daıyn ekenin kórsetý.
— Qazirgi tańda jalpy quny 3 trln teńgeden asatyn 1300 kelisim jasaldy. Buryn basymdyq áleýmettik mańyzy bar, halyqtyń kúndelikti tirshiligin qamtamasyz etetin jobalarǵa berilse, qazir avtomobıl joldary, turǵyn úı-kommýnaldyq sharýashylyǵy, sýmen jabdyqtaý jáne sý burý salalaryndaǵy jobalar da júzege asyrylyp jatyr, — dedi Aıdos Kóbetov.
Ol sondaı-aq byltyr Memleket basshysynyń tapsyrmasymen erekshe mańyzy bar iri jobalar tizimi aıqyndalǵanyn atap ótti.
Aıta keteıik, buǵan deıin Qazaqstannyń memlekettik-jekemenshik áriptestik jobalaryn iske asyrýda Azııa damý banki jáne ózge de halyqaralyq qarjy ınstıtýttarymen yntymaqtastyqty kúsheıtip jatqany habarlanǵan edi.
