Qazaqstanda quny 2 mlrd dollardan asatyn 7 «jasyl» joba júzege asady
ASTANA. KAZINFORM – Qazaqstannyń Damý banki jalpy somasy 2 mlrd dollardan asatyn «jasyl» jobalar boıynsha 7 kelisimge qol qoıdy.
Bul jobalar jańa jumys oryndaryn ashýǵa, bıýdjetke salyq túsimderin arttyrýǵa jáne eksporttyq áleýetti kúsheıtýge baǵyttalǵan. Qol qoıylǵan qujattar aıasynda birqatar iri energetıkalyq jáne ónerkásiptik jobalardy iske asyrý kózdelgen.
– Jambyl oblysynda qýaty 1 GVt bolatyn «Aktas Enerdjı» JShS jel elektr stantsııasyn salý jobasy iske asyrylady. Oǵan Proparco, DEG, Société Générale jáne ózge de halyqaralyq qarjy ınstıtýttary qatysady. Sonymen qatar Qyzylorda oblysynda qýaty 70 MVt «Vigor Holding» JShS kún elektr stantsııasy salynady. Jambyl oblysynda Merki sý elektr stantsııalary kaskady, Batys Qazaqstan oblysynda jylyna 1,5 mln tonna kalıı tyńaıtqyshyn óndiretin zaýyt, sondaı-aq Qaraǵandy oblysyndaǵy «Qarmet» AQ-ny keshendi gazdandyrý jobasy júzege asyrylady. Bul bastamalar eldiń 2060 jylǵa qaraı kómirtegi beıtaraptyǵyna qol jetkizý maqsatyna baǵyttalǵan, – delingen habarlamada.
Budan bólek, Qazaqstannyń Damý Banki Frantsııanyń damý agenttigimen jańartylatyn energııa kózderi salasyndaǵy yntymaqtastyq týraly kelisimge jáne Jasyl klımat qorymen ózara túsinistik týraly memorandýmǵa qol qoıǵan.
Sarapshylardyń pikirinshe, mundaı jobalar Qazaqstannyń Ortalyq Azııadaǵy «jasyl» transformatsııadaǵy rólin kúsheıtip, turaqty ekonomıkalyq ósimge serpin beredi.
Aıta keteıik, Qazaqstan «Ortalyq Azııanyń jasyl qalqany» bastamasyn usyndy.
