Qazaqstanda kúndizgi jalpy bilim beretin mektepterdiń 98,6 paıyzy - memlekettik oqý oryndary
ASTANA. 24 qańtar. QazAqparat - 2012/2013 oqý jylynyń basyna Qazaqstan Respýblıkasynda 7636 kúndizgi jalpy bilim beretin mektepter jumys istedi, olardyń 7529-y nemese 98,6% memlekettik bolyp tabylady.
QR Statıstıka agenttiginiń málimetinshe, 2012 jyly jalpy respýblıka boıynsha 112 jańa mektep paıdalanýǵa berildi, onyń ishinde 86-sy - aýyldyq eldi mekenderde.
Mektepterdiń jalpy sanynan bastaýysh mektepterdiń úles salmaǵy 12,2% quraıdy, negizgi mektepter - 14,7%, orta mektepter - 69,3%.
Bastaýysh mektepterdiń jalpy sanynan 95,6% aýyldyq eldi mekenderde ornalasqan, negizgi jáne orta mektepter boıynsha bul kórsetkish tıisinshe 93,6% jáne 70,5% quraıdy.
2012/2013 oqý jylynyń basyna kúndizgi jalpy bilim beretin mektepterdegi oqýshylar sany 2533,9 myń adamdy qurady, ol ótken oqý jylymen salystyrǵanda 0,4%-ǵa kem.
Qarastyrylyp otyrǵan oqý jylynda jalpy bilim beretin mektepterde balalardy oqytý 7 tilde júrgizildi: qazaq, orys, ózbek, uıǵyr, tájik, nemis, jáne aǵylshyn.
Qazaqstan Respýblıkasynda qazaq tilinde 3838 jáne orys tilinde 1442 oqytatyn mektepter basym (orta jáne joǵary oqý oryndary janyndaǵy mektepterdi, arnaıy túzetý mektepterin qospaǵanda). Sonymen qatar 60 mektepte oqytý ózbek tilinde, 13-i - uıǵyr, 8-i - aǵylshyn, jáne 2-ýi - tájik tilinde júrgiziledi. Sondaı-aq 2161 mektepte oqytý eki nemese odan kóp tilderde júrgiziledi. Ótken oqý jylymen salystyrǵanda oqytý tek qana ózbek tilinde júretin mektepter sany 2 mektepke ósti.
2012/2013 oqý jylynda respýblıka mektepterinde bilim berý baǵdarlamasy aıasynda, sonymen qosa fakýltatıvti jáne derbes pán retinde, dúngen (4140 oqýshy), túrik (2194), uıǵyr (4087), aǵylshyn (1624), polıak (645), kúrd (426), ázirbaıjan (339), koreı (197), tatar (42) jáne basqa ulttyq tilderdi oqytý uıymdastyryldy.
2012/2013 oqý jylynyń basyna respýblıkada ár túrli pánderdi tereńdetip oqytý múmkindigimen 1644 mektep, odan 289 mektep - gımnazııalyq jáne 65 mektep lıtseılik synyptarmen jumys istedi.
