Qazaqstanda kúndizgi aýa temperatýrasy 15 gradýsqa deıin tómendeıdi
NUR-SULTAN. QazAqparat – Sınoptıkter Qazaqstanda 1-3 tamyz kúnderi bolatyn aýa raıyna boljam jasady, dep habarlaıdy QazAqparat «Qazgıdromet» RMK-ǵa silteme jasap.
«Taıaý kúnderde respýblıkadaǵy aýa raıy ortalyǵy Ekaterınbýrgke týra keletin tsıklon yqpal etedi. Soǵan baılanysty Qazaqstan aýmaǵynyń basym bóliginde aýa raıy qubylmaly bolady. Jańbyr jaýady, soltústik jáne batys óńirlerde ol kúsheıýi múmkin. Kúndizgi aýa temperatýrasy tómendep, 15…25°S aınalasynda bolady», - delingen habarlamada.
Sınoptıkterdiń aıtýynsha, keı jerlerde daýyl turyp, burshaq jaýýy múmkin. Tek respýblıkanyń ońtústiginde jaýyn-shashynsyz ystyq aýa raıy ózgermeıdi. Bul óńirlerde aýa temperatýrasy 32…40°S aınalasynda bolady.
