Qazaqstanda kúnbaǵys maıynyń tapshylyǵy joq, bolǵan da emes – mınıstr

NUR-SULTAN. QazAqparat – QR Aýyl sharýashylyǵy mınıstri Erbol Qarashókeev kúnbaǵys maıyn elden áketýge ne úshin shekteý qoıylǵanyn túsindirdi, dep habarlaıdy QazAqparat tilshisi.

«Qazaqstanda kúnbaǵys maıynyń tapshylyǵy joq, bolǵan da emes. Negizi álemdegi daǵdarysty qarap otyrsańyz, ótken 3-4 aıda kúnbaǵys maıy qymbattap ketti. Kórshiles elderde maı eki-úsh ret qymbattap, tabylmaı halyqtyń dúrlikken kezderi boldy. Qazaqstandy alsaq, biz jyl kóleminde 1 mln tonna kúnbaǵysty ózimiz shyǵaramyz jáne óńdeımiz. Negizi Qazaqstandaǵy kúnbaǵys maıyn qaıta óńdeý zaýyttary 2 mln tonna kúnbaǵysty óńdeı alady. Demek, júktelip otyrǵan deńgeıi tómen, 50-aq paıyzy tolyp otyr. Sol sebepti, biz kúnbaǵys maıynyń ózine kvota engizgen bolatynbyz», - dedi E.Qarashókeev Májilis otyrysynan keıin tilshilerge bergen suhbatynda.

Mınıstrdiń aıtýynsha, bul kvotalar tamyzdyń aıaǵyna deıin kúshinde bolady, onda 15 myń tonna kúnbaǵys, 68 myń tonna shıki kúnbaǵys maıyn shyǵarýǵa kvota berilgen.

«Biz óz aldymyzǵa balansty saqtaý talabyn qoıyp otyrmyz. Birinshiden, kúnbaǵystyń ózin shyǵarýǵa ruqsat etip, óz zaýyttarymyzdyń da júktemesin qamtyp, kúnbaǵys maıyn ózimiz óndiretindeı deńgeıge shyǵarý. Kúnbaǵysty 1 mln tonna emes, 4 mln tonna etip shyǵara alsaq, árıne shekteý kvotasyn qoımaıtyn edik. Sol sebepti biz kvota engizgende baǵasyn muqııat qarap, sharýalar keler jyly kúnbaǵys ekpeı qoımasyn dep, balansty saqtap otyrmyz», - dedi Erbol Qarashókeev.

Aıta keteıik, el aýmaǵynan kúnbaǵys maıyn áketýge engizilgen shekteýler 2021 jylǵy 15 jeltoqsannan bastap 2022 jylǵy 1 maýsymǵa deıin qoldanylǵan edi. Memlekettik kirister komıteti shekteý sharalaryn 31 tamyzǵa deıin uzartty.

Foto: ktk.kz