Qazaqstanda kúnbaǵys maıy óndirisi bir jylda 46 %-ǵa ósti

ASTANA. QazAqparat - Qazaqstanda ótken jyly 960,5 myń gektar bolǵan kúnbaǵys tuqymyna arnalǵan egis alqaby bıyl 1 mln gektarǵa deıin ulǵaıdy, dep habarlaıdy QazAqparat.

Aýyl sharýashylyǵy mınıstrliginiń málimetinshe, egin jınaý aıaqtaýǵa jaqyn, búgingi kúni fermerler bul daqyldyń egis alqaptarynyń 96 %-yn jınap, shamamen 1,2 mıllıon tonna kúnbaǵys bastyrdy. Bul ótken jylǵy kórsetkishten 2 ese kóp.

«Sonymen qatar, kúnbaǵys maıyn óndirý kólemi ósip keledi. Bıylǵy qyrkúıekke qaraı kásiporyndar 352,3 myń tonna shyǵardy, bul 2021 jyldyń sáıkes kezeńinen 46,3%-ǵa artyq.

Otandyq kúnbaǵys maıynyń bir bóligi eksportqa shyǵarylady. 2022 jyldyń basynan bastap shetelge 173,1 myń tonna ónim satyldy, bul ótken jylmen salystyrǵanda 2,7 ese kóp», - dep jazdy vedomstvodan.