Qazaqstanda kúnbaǵys maıy men un satylymy kúrt ósti
ASTANA. IKAZINFORM — Qazaqstan aýyl sharýashylyǵy ónimderiniń eksportyn arttyryp keledi. Bıyl segiz aıda kúnbaǵys maıy, un jáne ózge de ónimderdiń eksporttyq túsimi aıtarlyqtaı ósti. Bul týraly AShM málim etti.
Qazaqstan aýyl sharýashylyǵy shıkizaty men ony óńdeý arqyly alynatyn ónimderdiń eksportyn ulǵaıtyp otyr. Ásirese, jekelegen taýar túrleri boıynsha eksport ósimi jalpy eksporttyń ósý qarqynynan edáýir joǵary.
Onyń ishinde erekshe atap óterligi kúnbaǵys maıy. Qańtar–tamyz aılarynda eksporttyq túsim 48,5%-ǵa ósip, 672,8 mln AQSh dollaryna jetti. Al ónim kólemi 35,9%-ǵa ulǵaıyp, 611,4 myń tonnany qurady. Ótken jyly Qazaqstan kúnbaǵys maıyn eksporttaýshy álemdegi úzdik alty eldiń qataryna enip, Qytaı naryǵyna jetkizýshiler arasynda ekinshi orynǵa shyqty. Sondaı-aq kúnbaǵys kúnjarasyn eksporttaý boıynsha Eýropalyq odaq pen Qytaıǵa ónim jetkizetin úsh iri eldiń qataryna qosyldy. Buǵan qosa, Qazaqstan Ortalyq Azııa elderiniń osy ónimge degen suranysynyń edáýir bóligin qamtamasyz etip otyr.
— Astyq salasynda da ósim qarqyndy. Bıdaı eksporty 26,5%-ǵa artyp, 1,25 mlrd AQSh dollaryna jetti. Shetelge 5,5 mln tonnadan astam astyq jóneltildi. Bul ótken jyldyń sáıkes kezeńindegi kórsetkishten 13,8%-ǵa joǵary, — delingen habarlamada.
Astyqty tereń óńdeý arqyly alynatyn ónimderdiń eksporty da artýda. Bıdaı jáne bıdaı-qarabıdaı uny eksportynyń túsimi 36%-ǵa ósip, 400 mln AQSh dollaryn qurady. Al ónim kólemi 22,8%-ǵa artyp, 1,38 mln tonnaǵa jetti.
Eksport qarqyny joǵary taýarlardyń taǵy biri – zyǵyr tuqymy. Segiz aıda 2,3 ese ósip, 387,8 mln AQSh dollaryna jetti. Al shetelge jóneltilgen ónim kólemi 2,5 ese ulǵaıyp, 780,8 myń tonnany qurady.
Janýarlarǵa arnalǵan daıyn jemshóp ónimderiniń eksporty da ósim qataryn tolyqtyryp, 60,8%-ǵa artyp, 577,6 mln AQSh dollaryna jetse, ónim 44,2%-ǵa ulǵaıdy.
— Jalpy, kúnbaǵys maıy, un jáne janýarlarǵa arnalǵan daıyn jemshóp ónimderiniń eksporty 1,65 mlrd AQSh dollaryn qurady. Ótken jyldyń sáıkes kezeńimen salystyrǵanda osy úsh atalym boıynsha eksporttyq túsim 48%-ǵa artqan, — dep habarlady vedomstvodan.
Bul Qazaqstan eksportynyń qurylymy birtindep ózgerip, qosylǵan quny joǵary óńdelgen ónimderdiń úlesi artyp kele jatqanynyń aıqyn dáleli. ıAǵnı elimiz aýyl sharýashylyǵy shıkizatyn syrtqa satýmen ǵana shektelmeı, daıyn ónimge aınaldyryp, halyqaralyq naryqtaǵy ornyn nyǵaıta tústi.
