Qazaqstanda kún jylyna bastaıdy
ASTANA. QazAqparat - Qazaqstandaǵy aýa raıyn áli de ortalyǵy Altaı ústinde turǵan sýyq antıtsıklon belgilep otyr. Sondyqtan da demalys kúnderi kóptegen oblysta aýa temperatýrasy klımattyq normadan 8-15°S, al ońtústik, ońtústik-shyǵysta 17...22°S tómen boldy. Bul jaıly Qazgıdrometke silteme jasap «QazAqparat» HAA habarlaıdy.
Biraq qatty aıaz álsirep keledi, 29 qańtar kúni respýblıkanyń soltústik bóliginde aýa temperatýrasy mınýs 20...27°S gradýsty kórsetýde.
Aldaǵy úsh kúnde Atlant muhıty jáne Qara teńizden kóterilgen jyly ári ylǵaldy aýa massalary Qazaqstannyń batys, soltústik óńirlerinde, sonymen birge ońtústik, shyǵys oblystarynda da kúnniń jylynýyna septigin tıgizedi.
