Qazaqstanda kún energııasymen qýat alatyn elektromobıl stantsııalarynyń jelisi keńeımek
ASTANA. KAZINFORM — Elordada TMD elderinde alǵash ret elektromobılderge arnalǵan tolyq avtonomdy, kún energııasymen jumys isteıtin zarıadtaý stantsııasy tanystyryldy. Aldaǵy ýaqytta mundaı stantsııalar jelisin Qazaqstan óńirlerinde keńeıtý josparlanyp otyr.
QR Ekologııa jáne tabıǵı resýrstar mınıstrliginiń málimetinshe, jańa nysan «Alataý» sport kesheniniń aýmaǵynda ornalasqan. Ony otandyq «BOLASHAQ POWER» JShS ázirlegen.
Stantsııa qalalyq elektr jelisine táýelsiz jumys isteıdi. Nysan qýaty 100 kVt kún elektr stantsııasy men syıymdylyǵy 645 kVt·saǵ energııa jınaqtaý júıesin biriktiredi. Joba Qazaqstannyń Jasyl taksonomııasynyń talaptaryna sáıkes keledi.
Ekologııa jáne tabıǵı resýrstar vıtse-mınıstri Mansur Oshýrbaevtyń tóraǵalyǵymen ótken jumys keńesinde mundaı stantsııalardy respýblıkalyq mańyzy bar negizgi avtojoldardyń boıyna, qalalarǵa, ónerkásip oryndary men basqa da ınfraqurylym nysandaryna ornatý múmkindigi qarastyryldy.
— Biz jekelegen «jasyl» nysandar salýmen shektelmeı, tómen kómirtekti ekonomıkanyń tutas ınfraqurylymyn qalyptastyrýymyz kerek. Onda jańartylatyn energııa kózderi, elektr kóligi, ınnovatsııalyq tehnologııalar men kómirtegi jobalary bir júıede jumys isteýge tıis. Bizdiń mindetimiz — jekelegen demonstratsııalyq jobalardan olardyń Qazaqstan óńirlerinde keńinen qoldanylýyna kóshý. Bul rette ınvestorlar úshin ekonomıkalyq turǵydan tartymdy jaǵdaılar qalyptastyrý qajet, — dedi Mansur Oshýrbaev kóshpeli jumys keńesinde.
Vıtse-mınıstrdiń aıtýynsha, endigi mindet — ázirge jekelegen nysandarda qoldanylyp otyrǵan mundaı sheshimderdi Qazaqstan óńirlerine keńinen engizý.
Ekologııa jáne tabıǵı resýrstar mınıstrligi mundaı stantsııalar jelisin damytý Parıj kelisiminiń 6-baby aıasyndaǵy klımattyq jobalardy kóbeıtýge, jeke ınvestıtsııa tartýǵa jáne kólik salasynan bólinetin parnıktik gazdar kólemin azaıtýǵa múmkindik beredi dep esepteıdi.
Joba tanystyrylymy aıasyndaǵy jumys keńesine Ekologııa jáne tabıǵı resýrstar vıtse-mınıstri Mansur Oshýrbaev tóraǵalyq etti. Oǵan Kólik mınıstrligi, Astana qalasynyń ákimdigi, «QazAvtoJol» UK» AQ jáne Halyqaralyq jasyl tehnologııalar jáne ınvestıtsııalyq jobalar ortalyǵynyń ókilderi qatysty.
Eske salaıyq, buǵan deıin Oljas Bektenov ońtústik óńirlerdiń elektr energııasy senimdiligin kúsheıtýdi tapsyrǵan edi.
