Qazaqstanda kún elektr stantsııalaryna arnalǵan panelder óndirisi klasteri iske qosylady
ASTANA. QazAqparat - Beıjińde Kazakh Invest kompanııasynyń qoldaýymen ótken Qazaqstan-Qytaı Іskerlik keńesiniń otyrysy barysynda jańartylatyn energetıka salasyndaǵy jobalardy iske asyrý boıynsha yntymaqtastyq týraly kelisimge qol qoıyldy, dep habarlaıdy primeminister.kz.
Ótken aptada Frantsııada kelissózder ótkizildi, olardyń qorytyndysy boıynsha birlesken kásiporyn qurý maqsatynda Kazakh Invest, ECM Technologies frantsýz kompanııasy jáne qytaılyq CEEC-NWPC International kompanııasy úshjaqty kelisimge qol qoıdy. Bul kelisim aıasynda kún elementteriniń tolyq tsıklin óndirý ǵana emes, sonymen qatar stantsııalar qurylysyn bastan-aıaq salý da qarastyrylǵan. Alǵashqy tapsyrystar Reseıde (300 MVt) jáne Ortalyq Azııa elderinde josparlanyp otyr. Sonymen qatar, Kazakh Invest qoldaýymen qytaı kompanııalary QR-da joǵary tehnologııalyq óndiristerdi iske qosýda.
Kazakh Invest basqarma tóraǵasy Saparbek Tuıaqbaevtyń aıtýynsha, Іskerlik keńes aıasynda 15 jobaǵa qol qoıylǵan, olar negizinen ınnovatsııalyq óndirister.
Máselen, CITIC Construction Co. vıtse-prezıdenti Djınchıang ıAngpen birlestikte joǵarǵy klasty jaǵarmaı, benzın jáne dızel fratsııalary, mıneraldy otyn jáne suıyltylǵan kómirsýtek gazdary óndirisi boıynsha kelisimge qol qoıdy.
Sonymen qatar Hebei Hua Tong Cable kompanııasymen jasalǵan kelisim Qaraǵandy oblysynda kabel ónimderiniń óndirisi jobasyn iske asyrýǵa baǵyttalǵan. «Farma Beıchjýn-Ilın» kompanııasymen qytaı medıtsınasy jáne dárilik shópter ósirý ortalyǵyn qurý boıynsha yntymaqtastyq týraly kelisimge qol qoıyldy.
Budan ózge, «QazAzot» AQ, Cathay Industrial Biotech jáne CITIC Construction Co. arasynda QR-da bıohımııalyq klasterdi damytý týraly qujattarǵa; «Allıýr kompanııalar toby» AQ, qytaılyq SMS kompanııasy jáne «Báıterek» holdıngi arasynda avtomobıl klasterin odan ári damytý jónindegi jol kartasyna; «Agromashholdıng KZ» AQ men YTO arasynda traktorlar qurastyrý óndirisin uıymdastyrý boıynsha memorandýmǵa, sonymen qatar Kazakh Invest, ECM Technologies frantsýz kompanııasy jáne qytaılyq CEEC-NWPC International kompanııasy arasynda jańartylatyn energetıka salasyndaǵy jobalardy júzege asyrý boıynsha yntymaqtastyq týraly kelisimge qol qoıyldy.
Aıta keteıik, Qazaqstandaǵy kún elektr stantsııalarynyń qurylysyna ınvestıtsııalardyń jalpy kólemi $300 mln kóleminde josparlanǵan, olar NPWC kompanııasynyń jáne qytaı qarjylyq ınstıtýttarynyń qatysýymen tartylatyn bolady.
