Qazaqstanda qulpynaı baǵasy qansha

Bıyl kóktemde óńirlerde qulpynaıdyń kelisi 1 100 – 4 500 teńge bolyp tur. Baǵany salystyrǵan kezde aıyrmashylyq tórt ese ekenin bilýge bolady. Oǵan logıstıka, jergilikti óndirýshilerdiń qýattylyǵy men tasymaldaý qashyqtyǵy áser etedi.

Elimiz boıynsha baǵa ońtústik óńirlerde tómen. Eń arzany Qyzylorda qalasynda satylyp jatyr. Qulpynaı kelisi – 1 100 – 1 800 teńge. Jıdektiń kelisi Túrkistanda 1 200 – 1 500 teńge, Shymkentte – 1 200 – 2 200 teńge. Al Taraz qalasynda 1 300 – 2 000 teńge bolsa, Taldyqorǵanda 1 600 – 1 800 teńgege satylyp jatyr. Sonymen birge Qaraǵandy qalasynda kelisi 1 500 – 2 500 teńge aralyǵynda.

Astana, Almaty, Qonaev, Pavlodar, Petropavl, Kókshetaý, Jezqazǵan, Qostanaı men Oral qalasynda baǵa ortasha. Al Almaty qalasynda qulpynaı kelisi 1 800 – 2 500 teńge aralyǵynda. Qonaev qalasynda da dál osy baǵa saqtalǵan.

Pavlodar qalasynda baǵa 1 800 – 2 200 teńge, Astanada 2 000 – 3 200 teńge aralyǵynda. Petropavlda jıdektiń bul túrin turǵyndar 2 000 – 2 800 teńgege, Kókshetaýda 2 400 – 2 700 teńgege satyp alyp júr. Jezqazǵanda baǵa 2 000 – 3 000 teńge, al Qostanaı men Oralda 3 500 teńgeden bastalady.

Baǵa elimizdiń batys óńirlerinde joǵary. Atyraý qalasynda qulpynaıdyń kelisi 4 500 teńgege jetken. Al Aqtóbe qalasynda baǵa 3 500 – 4 500 teńge aralyǵynda. Aqtaý qalasynda jıdektiń bul túrin 3 000 – 4 000 teńgege satyp alýǵa bolady. Sonymen birge Shyǵys Qazaqstandaǵy qalalarda, onyń ishinde Óskemen men Semeıde baǵa 2 700 – 3 000 teńge aralyǵynda.

Sarapshylar baǵa arasyndaǵy aıyrmashylyqty kólik tasymalynyń shyǵyny men maýsymdyq jetkizýge baılanysty dep otyr. Ońtústik óńirlerde qulpynaı erte pisedi. Munda jylyjaı sharýashylyǵy jaqsy damyǵan. Batys jáne soltústik óńirler ózge oblystardan jetkizedi, keıde ımporttaıdy.

Qazir qulpynaı jappaı pisip jatyr. Soǵan saı baǵa da taıaýda túsýi múmkin.

Aıta keteıik, buǵan deıin Qazaqstanda tal men kóshet baǵasy týraly jazyldy.