Qazaqstanda quqyqtyq aqparattyń biryńǵaı júıesi engizildi
ASTANA. QazAqparat - Qazaqstanda Biryńǵaı quqyqtyq aqparat júıesi engizildi, dep habarlaıdy «QazAqparat» HAA QR Ádilet mınıstrligine silteme jasap.
«Qazaqstan Respýblıkasynyń zańnamasyn elektrondy túrde shoǵyrlandyrý jáne ony etalondyq ári anyqtamalyq aqparat túrinde usyný maqsatynda Biryńǵaı quqyqtyq aqparat júıesi (BQAJ) engizildi. Ol úshin Normatıvtik-quqyqtyq aktilerdiń etalondyq baqylaý bankiniń aqparattyq júıesi men «Ádilet» júıesi biriktirildi», - delingen habarlamada.
Biryńǵaı júıeniń fýnktsıonaldyq múmkindikteri qajetti qujattardy osy aqparattyq júıelerdiń qaısysynan bolsa da izdeý múmkindigin beredi.
«Biryńǵaı quqyqtyq aqparat júıesiniń iske qosylýyna baılanysty «Ádilet» aqparattyq-quqyqtyq júıesiniń ınterfeısine ózgeris engizildi jáne qoldaný múmkindikteri arttyryldy. Tirkelgen paıdalanýshylardyń normatıvtik-quqyqtyq aktilerdiń mátinine pikir bildirýine jáne baǵalaýyna jol ashyldy», - dep kórsetiledi habarlamada.
Júıege zan.gov.kz belgisi arqyly kirýge bolady.
Tolyǵyraq aqparatty myna nómirlerden alýǵa bolady: 8(7172) 57-66-45, 57-74-03.
