Qazaqstanda quqyqqorǵaý organdary qyzmetkerlerin attestatsııadan ótkizý 3 jyl saıyn júrgiziletin bolady
ASTANA. QazAqparat - Qazaqstanda quqyqqorǵaý organdary qyzmetkerlerin attestatsııadan ótkizý turaqty túrde 3 jyl saıyn júrgizilip turatyn bolady. Bul týraly búgin Astanada ótip jatqan TMD múshe-memleketteriniń ІІM/Polıtsııasy kadr apparattary jetekshileriniń keńesinde QR Іshki ister mınıstriniń orynbasary Erlan Turǵymbaev aıtty.
«Kezekten tys attestatsııa ótkizý bizdiń búkil júıemizdiń dúr silkinip, básekege qabiletsiz kadrlyq masyldyqtan arylýyna múmkindik berdi. Endi qyzmetkerlerdi attestatsııadan ótkizý turaqty túrde 3 jyl saıyn bolyp turady», - dep atap ótti E. Turǵymbaev.
Aıta keteıik, quqyqqorǵaý organdary qyzmetkerlerin kezekten tys attestatsııalaý 2012 jyly ótkizilgen bolatyn. Oǵan 75 myńnan astam tártip saqshysy qamtylyp, olar QR zańnamasyn bilý boıynsha test tapsyryp, psıhologııalyq turaqtylyq jáne belgilengen normatıvter boıynsha atý jáne dene jattyǵýlary synaqtarynan ótken. Attestatsııa qorytyndylary boıynsha qyzmetkerlerdiń 85%-y óz qyzmetterine laıyqty dep tanylyp, qalǵandary qyzmetinen bosatylyp nemese shenderi tómendetilip, ıa bolmasa basqa qyzmetterge aýystyrylǵan.
«Kezekten tys attestatsııa ótkizý - ishki ister organdaryn kásibı emes qyzmetkerlerden tazalap, kadrlyq áleýetti arttyrýǵa arnalǵan tıimdi mehanızm», - dep atap ótti E. Turǵymbaev.
