Qazaqstanda quqyqtyq júıeni jańǵyrtý kezeńi bastaldy — Erlan Qarın
ASTANA. KAZINFORM — Búgin jańa Konstıtýtsııa kúshine endi. Jalpyhalyqtyq referendým nátıjesinde qabyldanǵan tarıhı qujat memlekettik basqarý júıesin, qoǵamnyń damý baǵytyn túbegeıli ózgertpek. Memleket basshysy Jańa Konstıtýtsııa kúshine engennen keıingi alǵashqy Jarlyqqa qol qoıýyna baılanysty Erlan Qarın pikir bildirdi.
— Bul — Prezıdenttiń Jańa Konstıtýtsııa zańdy kúshine engen soń qol qoıǵan alǵashqy Jarlyǵy ekenin aıta ketken jón. Qasym-Jomart Toqaev atap ótkendeı, Osy erekshe kún elimizdiń búkil saıası júıesin, sondaı-aq memlekettiń jáne azamattyq qoǵamnyń negizgi ınstıtýttaryn túbegeıli jańǵyrtý kezeńi bastalǵanyn ańǵartady, — dep jazdy Prezıdentiniń Ákimshiligi Basshysynyń birinshi orynbasary Erlan Qarın.
Jarlyqta Ata zańnyń erejelerine sáıkestendirý úshin Prezıdent bekitetin 100 astam normatıvti aktilerge ózgerister engizý kózdelgen.
— Osylaısha, Memleket basshysy 2026 — Konstıtýtsııalyq reformasyn qarqyndy iske asyrýdy jalǵastyrmaq. Jarlyqtyń mazmunyna kelsek, birqatar ózgerister termınologııalyq sıpatta bolyp otyr: «Quryltaı», jalpyhalyqtyq referendým», «teńge» jáne basqa da uǵymdar ózge aktilerde kórinis tapty. Budan bólek, memleketti damytýdyń konstıtýtsııalyq qısynyn aıqyndaıtyn túbegeıli ózgerister óte mańyzdy, — dedi ol.
Buǵan qosa Erlan Qarın «Qazaqstan Respýblıkasy ishki saıasatynyń negizgi qaǵıdattaryn, qundylyqtary men baǵyttaryn bekitý týraly» 2025 jylǵy 5 qarashada qabyldanǵan Jarlyqqa engizilgen túzetýlerdi aıryqsha atap ótken jón ekenin aıtty.
— Jańartylǵan redaktsııada Jańa Konstıtýtsııanyń zańdy kúshine enýi tarıhı meje dep kórsetilgen. Sondaı-aq, bul oqıǵa zamanaýı, barynsha serpindi memlekettik-saıası úlgige kóship, jańa qoǵamdyq etıka qalyptastyrýǵa berik negiz bolatyny aıqyndalǵan. Osyǵan baılanysty, elimizdiń júıeli jańǵyrtý kezeńinde ishki saıasat salasyna basa mán beriledi. Onyń basty mindeti — konstıtýtsııalyq qundylyqtar men qaǵıdattardy, ilgeriletý, qorǵaý jáne júzege asyrý bolmaq. Munyń bári memlekettik ınstıtýttardyń aldaǵy ýaqytta atqaratyn jumystaryna, qoǵamdyq dıalogty damytýǵa jáne jasampaz ári jaýapty minez-qulyq mádenıetin qalyptastyrýǵa arqaý bolady, — delingen jazbada.
