Qazaqstanda Quqyqtyq saıasat tujyrymdamasy jańartylady — Ádilet mınıstri
ASTANA. KAZINFORM — Astanada ótken «Konstıtýtsııalyq reforma: zańnamany jáne memlekettik basqarýdy damytýdyń zamanaýı úrdisteri» atty ǵylymı-praktıkalyq konferentsııada Ádilet mınıstri Erlan Sársembaev konstıtýtsııalyq reformany iske asyrý kezeńderi týraly aıtty.
Onyń sózinshe, konstıtýtsııalyq ózgerister zańnamany keń kólemde qaıta qaraýdy talap etti.
— Jańa konstıtýtsııalyq normalardy iske asyrý úshin kóptegen normatıvtik quqyqtyq aktini jańartý jáne memlekettik ınstıtýttardyń qyzmetin retteıtin jańa zańdardy qabyldaýdy qajet etedi. Osyǵan baılanysty bul jumysty eki kezeńde júrgizý týraly sheshim qabyldandy, — dedi mınıstr.
Birinshi kezeńde toǵyz zańnamalyq paket qabyldandy. Onyń ishinde jańartylǵan memlekettik ınstıtýttardyń quqyqtyq negizin qalyptastyrǵan alty konstıtýtsııalyq zań bar. Qazir memlekettik organdar zańǵa saı aktilerdi jetildirý jumystaryn júrgizip jatyr.
— Ekinshi kezeńniń mindeti — konstıtýtsııalyq jańashyldyqtardy barlyq salaǵa engizip, zańnamany jańa Konstıtýtsııa talaptaryna tolyq beıimdeý, — dedi Erlan Sársembaev.
Mınıstrdiń aıtýynsha, Parlamenttiń Quryltaıǵa kóshýi, Vıtse-prezıdent ınstıtýtyn engizý, Qazaqstan Halyq Keńesin qurý jáne ózge de ózgerister memlekettik basqarý júıesin jańǵyrtady. Osylaısha qoǵam men memleket arasyndaǵy qarym-qatynastyń jańa modelin qalyptastyrady.
— Bul ózgerister otandyq konstıtýtsıonalızmniń jańa kezeńin bastap qana qoımaı, zańgerler qaýymdastyǵynyń aldyna jańa mindetter qoıady, — dedi ol.
Erlan Sársembaev jańa Konstıtýtsııa qabyldanǵannan keıin Quqyqtyq saıasat tujyrymdamasyn qaıta qaraý qajettiligi týǵanyn da sóz etti.
— Bul baǵdarlamalyq qujatty jaı ǵana jańartý emes. Ol konstıtýtsııalyq reformany tolyq iske asyrýǵa, quqyqtyq júıeniń tutastyǵyn saqtaýǵa jáne zamanaýı zańnamany qalyptastyrýǵa negiz bolýy tıis, — dedi mınıstr.
Onyń aıtýynsha, konstıtýtsııalyq ózgerister azamattardyń quqyqtary men kepildikterin keńeıtti. Atap aıtqanda, jeke ómirge qol suqpaýshylyq, derbes derekterdi qorǵaý, turǵyn úı quqyǵy jáne zalaldy óteý máseleleri boıynsha jańa tásilder engizildi.
— Bul salalyq zańnamany jáne quqyq qoldaný tájirıbesin qaıta qaraýdy talap etedi. Sondyqtan Azamattyq kodekstiń jańa redaktsııasyn ázirleý máselesin talqylaý qajet, — dedi Erlan Sársembaev.
Mınıstrdiń sózinshe, kodekstiń jańa redaktsııasy Konstıtýtsııa normalaryn iske asyrýǵa, tsıfrlyq ekonomıkany damytýǵa, azamattar men ınvestorlardyń quqyqtaryn qorǵaýdy kúsheıtýge jáne zańnamany halyqaralyq standarttarǵa sáıkestendirýge múmkindik beredi.
Aıta keteıik, 1 shildeden bastap Konstıtýtsııalyq reformanyń úshinshi kezeńi bastalady.
