Qazaqstanda quqyǵy buzylǵan balalar BUU komıtetine júgine alady – zań jobasy
Májiliste «Bala quqyqtary týraly konventsııaǵa habarlar rásimine qatysty fakýltatıvtik hattamany ratıfıkatsııalaý týraly» QR Zańy jobasy qabyldandy, dep habarlaıdy Kazinform agenttigi.
Zań jobasyn Parlament Májilisinde QR Oqý-aǵartý mınıstri Ǵanı Beısembaev tanystyrdy.
Memleket basshysy 2020 jylǵy 1 qyrkúıektegi Qazaqstan halqyna Joldaýynda Úkimetke «Bala quqyqtary týraly konventsııanyń» habarlamalar rásimine qatysty fakýltatıvtik hattamaǵa qosylý týraly shara qabyldaýdy tapsyrǵan edi. Osy maqsatta bıyl 7 aqpanda Birikken Ulttar Uıymynyń shtab-páterinde uıymdaǵy elimizdiń turaqty ókili bul fakýltatıvtik hattamaǵa qol qoıdy.
«Úshinshi fakýltatıvtik hattama ratıfıkatsııalanǵan jaǵdaıda elimiz «Bala quqyqtary týraly konventsııanyń» barlyq fakýltatıvti hattamalaryna tolyǵymen qosylýdy aıaqtaıdy, al qazaqstandyq ár bala óz quqyqtaryn halyqaralyq deńgeıde qorǵaý múmkindigine ıe bolady. Fakýltatıvti hattamaǵa sáıkes, balalar men olardyń zańdy ókilderi BUU Bala quqyqtary jónindegi komıtetine el aýmaǵyndaǵy barlyq ishki quqyq qorǵaý quraldary arqyly, sonyń ishinde barlyq deńgeıdegi sottarda qaralyp, shyqqan sheshimmen kelispegen jaǵdaılar boıynsha ǵana júginýge quqyly», - dep túsindirdi Oqý-aǵartý mınıstri.
Al fakýltatıvtik hattama aıasynda túsken habarlamalardy BUU Bala quqyqtary jónindegi komıteti qupııa jáne jabyq tártippen qarap, usynymdaryn qajetti sharalardy qabyldaý úshin qatysýshy memleketke joldaıdy.
«Memleketimiz 1994 jyly Bala quqyqtary týraly konventsııany, 2001 jyly onyń «Balalardyń qarýly janjaldarǵa qatysýyna baılanysty» jáne «Balalardy saýdalaýǵa, balalar zınaqorlyǵyna jáne balalar pornografııasyna» qatysty eki hattamasyn ratıfıkatsııalady. Búginde úshinshi fakýltatıvtik hattamany ratıfıkatsııalaý arqyly biz balalar quqyqtary men bostandyqtaryn qorǵaý baǵytynda taǵy bir mańyzdy qadam jasaımyz», - deıdi mınıstr.
Sondaı-aq, Májilis depýtaty Rınat Zaıytov ratıfıkatsııalap otyrǵan hattamada adam men azamattyń QR Konstıtýtsııasy men zańdarynda kepildik berilgen quqyqtary men bostandyqtaryn shekteıtin normalar qamtylmaǵanyn atap ótti.
«Osy zań jobasyn qabyldaý Bala quqyqtary jónindegi komıtetke balalardan jáne olardyń ókilderinen quqyqtarynyń boljamdy buzylýy týraly habarlamalardy qaraýǵa múmkindik beredi. Hattamada Konventsııada bekitilgen quqyqtar buzylǵan jaǵdaıda jeke shaǵymdardy qaraý tetikteri kózdelgen. Bul óz kezeginde balalarǵa óz múddelerin halyqaralyq turǵyda qorǵaý quqyǵyn qamtamasyz etedi. Qazaqstannyń bul hattamaǵa qosylýy balalardy qorǵaýdyń quqyqtyq deńgeıin arttyrady», - dedi R. Zaıytov.
Depýtattar zań jobasyn qabyldaýdy jaqtap daýys berdi.
