Qazaqstanda Qudaıy as berý mádenıetin qalyptastyrýymyz qajet - Bas múftı E. Malǵajyuly (FOTO)
ALMATY. QazAqparat - Qazaqstanda Qudaıy as berý mádenıetin qalyptastyrýymyz qajet. Almaty qalasynda ótip jatqan Qazaqstan musylmandary dinı basqarmasynyń Ǵulamalar Keńesinde "Janaza" kitabyn talqylaý barysynda Bas múftı Erjan qajy Malǵajyuly osylaı dedi.
QMDB tóraǵasynyń aıtýynsha, keıbir adamdar durys túsinbeý saldarynan ári turmystyq jaǵdaıyn eskermesten, kisi qazasynan keıin asta-tók Qudaıy as berip jatady.
"Toıdyń jóni bólek. Al Qudaıy as berýdiń ózindik ádebi, tártibi bar emes pe!? Shekten tys shyǵynǵa batyp, ysyrap jasaýǵa bolmaıdy. Muny dinimiz de quptamaıdy. Biz elimiz boıynsha barshaǵa tıimdi bolatyn Qudaıy astyń ortaq mázirin ázirlep, kópshilik qaýymǵa usyndyq. Bul bastamamyzǵa el aǵalary, aqsaqaldar, zııaly qaýym ókilderi, meshit jamaǵaty úlken qoldaý kórsetip jatyr. Máselen, Pavlodar oblysyndaǵy ortalyq meshittiń ashanasynda osy as máziri boıynsha Qudaıy as berilip keledi. Jergilikti jamaǵat ıgi bastama úshin alǵysyn bildirip, izgi tilekterin jetkizýde. Qolǵa alǵan jumysymyz ózge de oblystarda júzege asady degen oıdamyz», - dedi Erjan qajy Malǵajyuly.
Qazaqstan musylmandary dinı basqarmasy baspasóz qyzmetiniń habarlaýynsha, Ǵulamalar Keńesiniń HІІ otyrysynda Bas múftımen qatar, teolog-ǵalymdar da qaryzǵa batyp, toı jasaǵandaı baryn tógip, dastarqandy tátti taǵamdarǵa, shyryn sýsyndaryna toltyryp jiberetinder týraly óz oılaryn ortaǵa saldy.
Qazaqstan musylmandary dinı basqarmasynyń Pavlodar oblysy boıynsha ókil ımamy Narıman Isenovtyń aıtýynsha, meshitke jergilikti halyq arasynan: «Nesıe alyp, Qudaıy as bersem bola ma?» - dep surap keletinder de bar eken.
«Bul - dinimizde quptalmaıtyn amal. Al biz usynǵan jańa as máziri asqa ketetin shyǵyndy eki esege azaıtady», - deıdi N. Isenov.
Al, Ǵulamalar Keńesinde talqylanyp jatqan "Janaza" kitabynda: "Qaıtys bolǵan kisiniń atynan as berý - musylman sharıǵatynda mindetti túrde atqarylýy tıis paryz amaldaryna jatpaıdy. ıAǵnı, jasalmaǵan jaǵdaıda eshbir adam kúnáhar bolmaıdy. Biraq jalpy alǵanda jurtqa tamaq taratýdyń saýapty is ekenin hadısterden jáne keıbir Quran aıattarynan baıqaımyz. Dinimizde mindetti túrde qaryzdanyp nemese ózińe qajetti qarjyńdy jumsap, qaıtys bolǵan kisi atynan úlken mal soıyp, sadaqa ber degen úkim joq. Sadaqalar, Qudaıy astar berilgen jaǵdaıda ysyrapqa jol berilmesten atqarylýy tıis», - delingen.
Aıta ketelik, elimizde Qudaıy as, sadaqa berý, mazar salý, jerleý, taǵy basqa da rásimderdi bir izge, biryńǵaı júıege keltirý maqsatynda ázirlenip jatqan "Janaza" kitaby Ǵulamalar Keńesiniń atsalysýymen jýyrda jaryqqa shyǵatyn bolady.
