Qazaqstanda qýaty 500 MVt jel elektr stantsııasy salynady

ASTANA. KAZINFORM – Qazaqstanda «jasyl» energetıka salasynda iri joba júzege asyrylmaq. Qaraǵandy oblysynda qýaty 500 MVt jel elektr stantsııasyn salý josparlanyp otyr. Bul týraly QR Energetıka mınıstrliginiń jańartylatyn energııa kózderi departamentiniń dırektory Turar Álimjan ekologııalyq sammıtte málimdedi.

Onyń aıtýynsha, joba qytaılyq ınvestıtsııa esebinen júzege asyrylady. Nysandy 2029 jylǵa deıin paıdalanýǵa berý josparlanǵan.

— Qaraǵandy oblysynda qýaty 500 MVt jel elektr stantsııasy salynady. Jobaǵa qytaılyq ınvestıtsııa tartylǵan, qurylys 2029 jylǵa deıin aıaqtalady, — dedi ol.

Sonymen qatar Pavlodar oblysynda qýaty 1 GVt bolatyn taǵy bir iri jel elektr stantsııasyn salý múmkindigi qarastyrylyp jatyr. Bul joba halyqaralyq kelisimder aıasynda júzege asýy múmkin.

Onyń aıtýynsha, jel elektr stantsııalary qansha tutynýshyny qamtamasyz etetinin naqty aıtý qıyn, sebebi elektr energııasyn óndirý kólemi jeldiń jyldamdyǵyna tikeleı baılanysty.

— Jeldiń kúshine qaraı elektr energııasynyń óndirisi ózgerip otyrady: jel álsiz bolsa, óndiris azaıady, al kúsheıse — artady. Sondyqtan qýatty naqty tutynýshylar sanyna baılanystyrý qıyn, — dedi Turar Álimjan.

Onyń málimetinshe, ótken jyldyń qorytyndysy boıynsha Qazaqstandaǵy «jasyl» energetıkanyń úlesi shamamen 7,7%-dy qurady. 2030 jylǵa qaraı bul kórsetkishti 15%-ǵa jetkizý josparlanyp otyr.

— Bul baǵytta birqatar jobalar júzege asyrylyp jatyr, sonyń ishinde qýaty 500 MVt jel elektr stantsııasynyń qurylysy bar, — dedi ol.

Sonymen qatar ol Ortalyq Azııadaǵy sý-energetıkalyq yntymaqtastyq máselesine toqtaldy. Aıtýynsha, óńir elderi arasynda resýrstar almasý tetigi saqtalǵan.

— Biz elektr energııasyn jetkizemiz, al onyń ornyna sý resýrstaryn alamyz. Bul — jyl boıy júzege asatyn ózara úderis, — dedi ol.

Sondaı-aq Qazaqstannyń Ózbekstan jáne Qyrǵyzstanmen birlesip, halyqaralyq qarjy ınstıtýttarynyń qatysýymen Qambar-Ata sý elektr stantsııasyn salý jospary bar ekeni aıtyldy.

— Joba qys mezgilinde sý resýrstaryn jınaqtap, jazda tıimdi paıdalanýǵa múmkindik beredi, — dedi Turar Álimjan.

Mınıstrlik dereginshe, Qazaqstan ishki elektr energııasyna degen suranysty tolyq qamtamasyz etip otyr. Degenmen jekelegen ýaqyttarda az kólemde ımport baıqalady, onyń jyldyq úlesi shamamen 3–4%-dy quraıdy.

Ortalyq Azııa elderindegi «jasyl» energetıkanyń damýy týraly osy analıtıkalyq materıaldan oqı alasyz.