Qazaqstanda qýaty 200 MVt deıingi data-ortalyq salynady
ASTANA. KAZINFORM - GITEX AI halyqaralyq tehnologııalyq forýmy aıasynda Qazaqstan Respýblıkasynyń Jasandy ıntellekt jáne tsıfrlyq damý mınıstrligi Dornan Engineering Group pen Ample Solutions Hong Kong (Turner Company) kompanııalarynan quralǵan halyqaralyq konsortsıýmmen yntymaqtastyq týraly memorandýmǵa qol qoıdy.
QR Jasandy ıntellekt jáne tsıfrlyq damý mınıstrligi baspasóz qyzmetiniń habarlaýynsha, memorandým aıasynda Qazaqstan aýmaǵynda Tier III–Tier IV deńgeıindegi joǵary senimdi derekterdi óńdeý ortalyǵyn (DÓO) salý jobasyn iske asyrý kózdelgen.
Nysannyń josparly qýaty 50-den 200 MVt-qa deıin jetedi. Qýaty 200 MVt (Tier IV deńgeıi) bolatyn data-ortalyq qurylysyna tartylatyn ınvestıtsııanyń boljamdy kólemi 1,5-ten 3 mıllıard AQSh dollaryna deıingi aralyqty quraıdy.
Jobany turaqty jáne derbes energııamen qamtamasyz etý maqsatynda qýaty 250 MVt-qa deıin bolatyn gaz elektr stantsııasyn salý josparlanǵan. Bul baǵyttaǵy ınvestıtsııa kólemi 200-den 400 mıllıon AQSh dollaryna deıin baǵalanyp otyr.
Qazirgi tańda jobanyń ornalasatyn jeri tańdalý ústinde. Basymdyq gaz ınfraqurylymyna jaqyn ornalasqan alańdarǵa beriledi, bul energııany tıimdi óndirýge jáne nysannyń úzdiksiz jumysyn qamtamasyz etýge jol ashady.
-Qazaqstannyń biregeı geografııalyq ornalasýy, salqyn klımaty men elektr energııasynyń salystyrmaly túrde qoljetimdiligi halyqaralyq derekterdi óńdeý ortalyqtaryn ornalastyrý men tsıfrlyq ınfraqurylymdy damytý úshin qolaıly jaǵdaı jasaıdy,- dep atap ótti Jaslan Mádıev.
Bul jobany iske asyrý elimizdiń tsıfrlyq ınfraqurylymyn ilgeriletýge, sheteldik ınvestıtsııa tartýǵa jáne Qazaqstannyń óńirlik tehnologııalyq hab retindegi bedelin nyǵaıtýǵa septigin tıgizedi.
Aıta keteıik, Prezıdent Qasym-Jomart Toqaev Jasandy ıntellektini damytý jónindegi keńestiń ekinshi otyrysynda aldymyzǵa Qazaqstandy zamanaýı tsıfrlyq memleketke aınaldyrý jóninde órshil maqsat qoıyp otyrǵanymyzdy aıtqan bolatyn.
