Qazaqstanda qýaty 1 GVt derekter ortalyqtary alqaby salynady

ASTANA. KAZINFORM — Qazaqstan 2029 jylǵa qaraı Pavlodar oblysyndaǵy derekterdi óńdeý ortalyqtarynyń jalpy qýatyn 1 GVt-qa jetkizýdi josparlap otyr. Jobanyń áleýetti jyldyq eksporttyq kirisi $3,1 mlrd, al 20 jyldaǵy ınvestıtsııa kólemi $115 mlrd dep baǵalanǵan. Bul týraly Úkimet málim etti.

Qazaqstanda qýaty 1 GVt derekter ortalyqtary alqaby salynady
Foto: Úkimet

Premer-mınıstr Oljas Bektenov Pavlodar oblysyndaǵy «Derekterdi óńdeý ortalyqtary alqaby» jobasyn júzege asyrý barysy týraly keńes ótkizdi. Joba Prezıdenttiń Qazaqstan halqyna Joldaýynda tsıfrlyq ekonomıkany qalyptastyrý jáne elimizdiń tsıfrlyq ózgerisin jedeldetý jóninde qoıǵan mindetterine sáıkes júrgizilip otyr. Jıynda qurylys jumystarynyń barysy, sondaı-aq jobany keńeıtý jáne ınvestıtsııa tartý baǵytynda atqarylyp jatqan jumystar týraly baıandamalar tyńdaldy.

Qazaqstanda qýaty 1 GVt derekter ortalyqtary alqaby salynady
Foto: Úkimet

Premer-mınıstrdiń orynbasary — jasandy ıntellekt jáne tsıfrlyq damý mınıstri Jaslan Mádıev jobanyń elimizdiń tsıfrlyq ekonomıkasyn damytý úshin mańyzdylyǵyn atap ótti. «DÓO alqaby» — qazaqstandyq eksportqa eleýli serpin bere alatyn tehnologııalyq jáne iri ekonomıkalyq joba. KPMG halyqaralyq agenttiginiń baǵalaýy boıynsha aldaǵy ýaqytta jyl saıynǵy áleýetti eksporttyq kiris $3,1 mlrd quraýy múmkin. Odan bólek, derekter ortalyqtarynyń 20 jylǵa eseptelgen búkil qyzmet etý merzimi ishinde elimizge quıylatyn ınvestıtsııalardyń jıyntyq kólemi $115 mlrd-qa baǵalanyp otyr.

— Jobanyń birinshi kezeńinde jalpy qýaty 304 MVt bolatyn úsh derekterdi óńdeý ortalyǵyn qurý qarastyrylǵan, — delingen habarlamada.

«Qazaqtelekom» AQ basqarma tóraǵasy Baǵdat Mýsın osy jyldyń tamyz aıynan bergi jumys barysy týraly baıandady. Atap aıtqanda, qýaty 68 MVt bolatyn birinshi derekterdi óńdeý ortalyǵynyń qurylys alańynda nysandardyń irgetasyn qalaý, ınfraqurylym nysandary men ákimshilik ǵımarattar salý jumystary bastalǵan. Birinshi ortalyqty 2027 jyldyń ekinshi toqsanynda paıdalanýǵa berý josparlanyp otyr.

Qazaqstanda qýaty 1 GVt derekter ortalyqtary alqaby salynady
Foto: Úkimet

Sonymen qatar qýaty 164 MVt bolatyn ekinshi Firebird AI derekter ortalyǵyn qurý jumystary da júrgizilýde. Qazirgi kezeńde qazanshuńqyr qazý jumystarynyń 70%-y aıaqtalǵan. Kampýsty damytý kezinde esepteý qýattaryn kezeń-kezeńimen odan ary arttyrý jáne energetıkalyq ınfraqurylym salý kózdelgen. Jumystardy aıaqtap, ortalyqty iske qosý 2027 jyldyń úshinshi toqsanyna josparlanǵan.

Sondaı-aq qýattylyǵy 72 MVt bolatyn úshinshi derekter ortalyǵynyń da qurylysy salynbaq, ol 2027 jyldyń tórtinshi toqsanynda iske qosylady.

«DÓO alqaby» jobasynyń ekinshi kezeńin júzege asyrý úshin Gaw Capital, Boosteroid jáne Firebird kompanııalarymen qýaty 480 MVt bolatyn esepteý qýattaryn ornalastyrý jóninde aldyn ala kelisimderge qol qoıyldy. Ony 620 MVt-qa deıin arttyrý múmkindigi bar. Qýaty 240 MVt bolatyn qosymsha esepteý qýattaryn ornalastyrý jáne ony 420 MVt-qa deıin ulǵaıtý múmkindigi boıynsha da Aleria, Energy Capital Global jáne China Energy kompanııalarymen kelissózder júrgizilýde. 2029 jylǵa qaraı «Derekterdi óńdeý ortalyqtary alqabynyń» jalpy qýatyn 1 GVt-qa jetkizý josparlanyp otyr.

Qazaqstanda qýaty 1 GVt derekter ortalyqtary alqaby salynady
Foto: Úkimet

Jobany qajetti energetıkalyq qýattarmen jáne ınjenerlik ınfraqurylymmen qamtamasyz etý máseleleri boıynsha energetıka mınıstri Erlan Aqkenjenov, Pavlodar oblysynyń ákimi Asaıyn Baıhanov baıandady.

Sonymen qatar úshinshi sýperkompıýterlik klasterdi qurý jobasyn júzege asyrý barysy talqylandy.

Keńes qorytyndysy boıynsha Premer-mınıstr «Derekterdi óńdeý ortalyqtary alqaby» ekonomıkanyń damýy úshin, ásirese Prezıdent jarııalaǵan Jalpyhalyqtyq aýqymdy qurylys jylynda ósip kele jatqan qajettilikterdi eskere otyryp, mańyzdy mánge ıe ekenin atap ótti. Jasandy ıntellekt jáne tsıfrlyq damý mınıstrligine «Qazaqtelekom» AQ-men birlesip ortalyqtardy belgilengen merzimde ýaqtyly júzege asyrý jáne iske qosý tapsyryldy.

Aıta keteıik, jaqynda qazaqstandyq muǵalimder men oqýshylardyń derekteri ınternetke tarap ketkeni habarlanǵan bolatyn.