Qazaqstanda qýańshylyq pen sý tasqynyn boljaý úshin JI qoldanyla bastaıdy

ALMATY. KAZINFORM – Almatyda III Halyqaralyq jas ǵalymdar kongresi aıasynda «AI For Science: Ǵylymı jańalyqtardyń jańa dáýiri» atty forým ótti.

qurǵaqshylyq
Kollaj: Kazinform/ Freepik

QR Prezıdenti janyndaǵy Ulttyq ǵylym akademııasynyń prezıdenti Aqylbek Kúrishbaev forým ashylýynda jasandy ıntellekt XXI ǵasyrdyń eń qýatty quraldarynyń birine aınalyp, ǵylymnyń ózine, zertteý júrgizý tásilderine de yqpal ete bastaǵanyn atap ótti. Onyń aıtýynsha, búginde JI derekterdi óńdeýge, zańdylyqtardy anyqtaýǵa jáne sheshim izdeý úderisin jedeldetýge kómektesedi.

Akademııa búginde AI for Science baǵytyn júıeli túrde damytyp keledi. Onyń maqsaty – Qazaqstanda jasandy ıntellektini qoldanatyn ǵylymı zertteýlerdiń zamanaýı ekojúıesin qalyptastyrý. Onyń ishinde Qazaqstan AI for Science bastamasy aıasynda sheteldik ǵylymı uıymdarmen ortaq jobalar qolǵa alynǵan.

Máselen, osy bastama aıasynda Qytaı ǵylym akademııasynyń Avtomattandyrý ınstıtýtynyń esepteý qýatyn paıdalana otyryp, Science One Panshi platformasyn qorǵalǵan ortada pılottyq rejımde iske qosylyp jatyr. Al Koreıanyń Ǵylymı-tehnıkalyq aqparat ınstıtýtymen birlesip UǴA AI SilkNet ortalyǵyn damytyp keledi. Sondaı-aq qytaılyq seriktestermen birge keńistik pen ýaqyt derekterin taldaýǵa arnalǵan DeepBAS jasandy ıntellekt platformasyn ázirlenip jatyr.

- Eki joba da QazTech memlekettik platformasynda tirkeldi. Bul olardy elimizdiń ǵylymı ınfraqurylymyna kiriktirýge jol ashady. Osy tehnologııalar qoldanylatyn alǵashqy baǵyttardyń biri – sý qaýipsizdigi. 2027 jyldan bastap sý teńgerimin boljaýǵa, qurǵaqshylyq pen sý tasqyny qaýpin baǵalaýǵa arnalǵan quraldardy synaqtan ótkizý josparlanyp otyr. Qazaqstan úshin bul jumys ornyqty damýǵa jáne mıllıondaǵan adamnyń ómir súrý sapasyna tikeleı qatysty, - dedi ol.

Sonymen qatar Aqylbek Kúrishbaev UǴA Qytaı ǵylym akademııasymen birge Space Dance bastamasy jasalyp jatqanyn aıtty. Ol sý resýrstaryn, muzdyqtardy, aýyl sharýashylyǵy alqaptaryn jáne qorshaǵan ortany zertteýde spýtnıktik tehnologııalardy qoldanýdy kózdeıdi.

Odan bólek QR Premer-mınıstriniń tapsyrmasymen birlesken jumys toby ǵaryshtan beriletin derekterdi joǵary jyldamdyqpen qabyldaıtyn jerústi stantsııasyn salý jobasyn pysyqtap jatyr. Bul stantsııa elimizdiń ǵaryshtyq derekterdi alý jáne olardy ǵylym men ekonomıkada paıdalaný múmkindigin edáýir keńeıtpek.

Eske salaıyq, UǴA málimeti boıynsha eldegi 28 myń ǵalymnyń jartysyna jýyǵy jastar.