Qazaqstanda krıptovalıýtalardy qoldanýdyń tujyrymdamasy jasaldy
ASTANA. QazAqparat - Qazaqstanda krıptovalıýtalardy qoldanýdyń tujyrymdamasy jasaldy. Bul týraly Astanada «Blokcheın retteý: múmkindikter men táýekelder» atty baspasóz máslıhatynda «Astana» Halyqaralyq qarjy ortalyǵy qarjy tehnologııalaryn retteý boıynsha departamentiniń dırektory Asylbek Dáýletov málim etti, dep habarlaıdy QazAqparat tilshisi.
«Qarjy tehnologııalarynyń damýyna jaıly jaǵdaıdy jasaý úshin AHQO-nyń negizgi mindetteriniń biri - Qazaqstanda ınnovatsııalyq jobalardy, elektrondy kommertsııa men qarjylyq tehnologııalardy damytý bolyp tabylady. Osyǵan baılanysty biz krıptovalıýtalar naryǵyn retteý tujyrymdamasyn qurdyq. Atalǵan tujyrymdama mamandandyrylǵan alańdar arqyly vırtýaldy valıýtalardy saqtaý men qoldaný baǵytyn retteýdi kózdeıdi», - deıdi ol.
Dáýletovtyń aıtýynsha, AHQO paktisinde krıptovalıýtalar júıesinde qoldanylatyn vırtýaldy valıýta, olardyń saralanýy, smart-kelisimder, tsıfrlyq ámııandar sekildi túsinikter engizilýde. Sonymen birge, bıtkoındar men ózge vırtýaldy valıýtalardyń túri paıda bolǵandyqtan, ICO - tıyndardy bastapqy deńgeıde ornalastyrý júıesi paıda bolǵan.
«Biz bólekteý joldy tańdadyq. AQSh pen ózge de damyp ketken memleketterdiń qazirgi zańnamasyn zerttep kórdik. Qazirgi tańda AQSh damý jaǵynan alǵa ozyp ketken memleket sanalady. Sebebi, onda startap-kompanııalardy damytýǵa múmkindik beretin «Sılıkon ańǵary» bar. Ol jaqta venchýrlyq qorlar damyp ketken. Sáıkesinshe, biz osy joldy tańdap, qundy qaǵazdardy jeke ornalastyrýdyń rejimin engizdik», - deıdi ol.
