Qazaqstanda krıptobırja ashyla ma
ASTANA. QazAqparat - Bıyl Qazaqstanda alǵash ret krıptobırja men krıptoaıyrbastaý beketi ashylady. Jańadan qurylǵan "DIGITAL NETWORK" sandyq texnologııalar men krıptoındýstrııa qaýymdastyǵy osyndaı boljam jasap otyr, dep xabarlaıdy QazAqparat tilshisi.
Uıym músheleri atalǵan bastamalarǵa ózderi de atsalysamyz dep otyr. "Biz krıptoaıyrbastaý beketteri men krıptobırjalar boıynsha Ulttyq bank tóraǵasy Aqyshev myrzamen kezdesýdi josparlap otyrmyz. Bizde arnaıy jospar bar. Oǵan sáıkes, Qarjy mınıstri Baqyt Sultanovpen krıptoındýstrııa men salyq salý máselesin de talqylaýdy kózdeımiz", - dedi qaýymdastyq basshysy Oljas Murtazın Astanada ótken baspasóz máslıxatynda.
Dál qazir Qazaqstanda krıptovalıýtalarǵa qatysty naqty zańnama joq. Soǵan qaramastan, krıptoaıyrbastaý beketterin ashýǵa bolady. DIGITAL NETWORK-tiń ınvestıtsııalardy tartý departamentiniń dırektory Erlan Shaıxymbaevtyń aıtýynsha, qazirgi kezde "Astana" Halyqaralyq qarjy ortalyǵy tıisti erejelerdi ázirlep jatyr. "Negizi, 2017 jyldyń sońynda bolady degen. Qazirgi kezde ony tolyqtyryp jatyr. Jaqyn arada kúshine enip, zańdastyrý jumystary júrgiziledi. Sondyqtan barlyq jumystar zańdy bolady. Eger erejelerdi qabyldaý sharalary uzaryp ketse, krıptoaıyrbastaý beketi óz jumysyn bastaı beredi. Óıtkeni dál qazir shekteý qoıylmaǵan. Al shekteý bolmaǵan soń ol zańsyz bolyp sanalmaıdy. Sosyn ol biz úırengen valıýta aıyrbastaý beketteri sııaqty emes. Krıptoaıyrbastaý beketi onlaın rejimde jumys isteıdi" - dep atap kórsetti E.Shaıxymbaev.
Krıptobırjasyz da bolmaıdy. Sebebi búginde álem boıynsha 200-den astam krıptobırja bar. Іri bırjalardyń kúndelikti aqsha aınalymy 6-10 mlrd dollardy quraıdy. Al barlyq krıptovalıýtalar naryǵy 500 mlrd dollarǵa baǵalanyp otyr. "Búgingi boljamǵa sáıkes, aldaǵy úsh-bes jyldyń ishinde 5 trıllıonǵa deıin baryp, on esege ósýi ábden múmkin. Sondyqtan osy naryqty jan-jaqty zerttep, bolashaǵy bar krıptovalıýtalarǵa ınvestıtsııa jasaǵan durys. Óıtkeni biz aqshany tek tutyný úshin qoldanamyz, kıim, tamaq, úıge neshe túrli zattardy satyp alamyz. Al shetelde aqshadan aqsha jasaıdy. Bizge de úırený kerek", - dep atap kórsetti E.Shaıxymbaev.
