Qazaqstanda krıptoamnıstııa men maınıngke qatysty jańa erejeler usynyldy
ASTANA. KAZINFORM — Astanada krıptoındýstrııany damytý perspektıvalary jáne tsıfrlyq aktıvterdi «kóleńkeli» aınalymnan zańdy naryqqa shyǵarý joldary talqylandy. «Atameken» Ulttyq kásipkerler palatasy basqarma tóraǵasynyń orynbasary Tımýr Jarkenov bul salada júıeli tásil qajet ekenin atap ótti.
Onyń aıtýynsha, buǵan deıin Qazaqstan maınıng salasynda álemdik deńgeıde aldyńǵy qatarda bolyp, úzdik úshtikke kirgen jáne jahandyq naryqtyń shamamen 13 paıyzyn qamtyǵan. Alaıda qazirgi ýaqytta bul pozıtsııalar álsirep, sektordy álemdik úrdisterge sáıkes damytý qajettiligi týyndap otyr.
Ol kórshiles elderdegi krıptoındýstrııanyń damýyna da toqtaldy, sonyń ishinde Qyrǵyzstanǵa erekshe nazar aýdardy.
— Qyrǵyzstan regýlıatorynyń derekterine sáıkes, olardyń krıptoındýstrııadaǵy zańdy aınalym kólemi 31 mıllıard dollar. Al bizde shamamen 8 mıllıard dollar. Degenmen, bul tek zańdy aınalym kórsetkishi, ıaǵnı budan bólek kóleńkeli aınalym bar ekenin eskersek, shynaıy naryq budan áldeqaıda úlken bolýy múmkin. Sondyqtan qazirgi 8 mıllıard dollar eldiń tolyq áleýetin kórsetpeı otyr, — dedi ol.
Osyǵan baılanysty ol buryn esepke alynbaǵan tsıfrlyq aktıvterdi zańdastyrý jáne salany damytý úshin krıptoamnıstııa engizý múmkindigin qarastyrýdy usyndy.
— Memleket tarapynan mańyzdy qadam jasaý qajet. Máselen, krıptoamnıstııa júrgizip, kóleńkeli aımaqtaǵy resýrstardy zańdastyryp, osy salanyń damýyna serpin berý kerek, — dedi basqarma tóraǵasynyń orynbasary.
Sondaı-aq ol maınıngti retteý máselesin kóterip, óndirilgen tsıfrlyq aktıvterdiń bir bóligin el ishinde satýdy usyndy. Onyń pikirinshe, maınerler óndirgen krıptoaktıvterdiń keminde 50 paıyzy Qazaqstanda satylýy tıis.
Osy oraıda ol «Atameken» UKP ókilderi bul saladaǵy sheshimderdi ázirleýge jáne krıptoındýstrııany damytýǵa qatysýǵa daıyn ekenin aıtyp, sektordyń el ekonomıkasy úshin úlken áleýeti baryn eske saldy.
Buǵan deıin Ulttyq banktiń retteýshilik «qumsalǵyshynda» 30-dan astam krıptojoba synaqtan ótip jatqany jóninde jazdyq.
