Qazaqstanda krematorıı men kolýmbarıı salynady
ASTANA. KAZINFORM – Densaýlyq saqtaý mınıstri «Zırattar men jerleý obektilerine qoıylatyn sanıtarııalyq-epıdemıologııalyq talaptar» sanıtarııalyq qaǵıdalaryna túzetýler ázirledi.
Ashyq NQA portalyna ornalastyrylǵan túzetýlerge sáıkes, kolýmbarııler men qaıtys bolǵan adamdardyń kúli bar jáshikterdi jerleýge arnalǵan qaıǵy qabyrǵalary arnaıy bólingen jer ýchaskelerine ornalastyrylýy kerek. Kolýmbarııler men qaıǵy qabyrǵalaryn zırattar aýmaǵynan tys jerlerde turǵyn úılerden, emdeý, balalar, bilim berý, sporttyq-saýyqtyrý, mádenı-aǵartý mekemeleriniń, baý-baqsha seriktestikteriniń, kottedjdik qurylystardyń, halyqty áleýmettik qamsyzdandyrý mekemeleriniń aýmaqtarynan keminde 50 metr qashyqtyqta oqshaýlanǵan jer ýchaskelerinde ornalastyrýǵa bolady. Krematsııadan keıingi qaldyqtardy (kúldi) ýrnalarǵa kómýge kolýmbarıılerde jáne qabirlerde jol beriledi.
Krematorııler jáne kolýmbarııler quramynda úı-jaılardyń mynadaı toptary kózdeledi:
- qaıtys bolǵan adamdardy tambýrmen, vestıbıýlmen, tońazytqysh kameramen qabyldaý úı-jaılary jáne qaıtys bolǵan adamdardy krematsııalaýǵa deıin saqtaýǵa arnalǵan úı-jaılar;
- qaıtys bolǵan adamdardy krematsııalaýǵa, krematsııa zaly, krematsııalanǵan qaldyqtardy óńdeý úı-jaıy, kúli bar jáshikter qoımasy, gaz tazartý úı-jaıy, jóndeý sheberhanasy, ınjenerlik-tehnıkalyq qyzmet úı-jaılary, sanıtarııalyq-tehnıkalyq úı-jaılary, demalys jáne psıhologııalyq turǵydan jeńildený bólmesi bar óńdeýge jáne saqtaýǵa arnalǵan úı-jaılar.
Krematorıılerdiń quramyna kiretin barlyq úı-jaılardy mehanıkalyq yntalandyrýmen jabdyqtaý jáne shyǵarý jeldetý júıelerimen jabdyqtaý qajet. Aýany qaıta óńdeý júıelerin qoldanýǵa jol berilmeıdi.
Krematorıı - qaıtys bolǵan adamdardy krematsııalaýǵa (órteýge) arnalǵan peshtermen jabdyqtalǵan tehnologııalyq keshen.
Kolýmbarıı – qaıtys bolǵan adamdardy krematsııalaýdan keıingi kúli bar jáshikterdi saqtaý orny.
Qujat 2 jeltoqsanǵa deıin qoǵamdyq talqylaýǵa shyǵarylyp otyr.
Osyǵan deıin elordada krematorıı qurylysy bastalǵany týraly jazdyq.
