Qazaqstanda kredıt pen shaǵyn nesıeniń paıyzdyq stavkasy tómendeıdi

ASTANA. KAZINFORM — Qarjy naryǵyn retteý jáne damytý agenttigi Ulttyq bankpen birlesip, ekinshi deńgeıdegi bankter men mıkroqarjy uıymdaryndaǵy qaryzdar boıynsha jyldyq tıimdi syıaqy stavkany tómendetetin qaýly jobasyn ázirledi.

Mıkrokredıt boıynsha somasy 45 AEK (166 140 teńge) deıingi jáne 45 kúnge deıingi kúndelikti nomınaldy mólsherlemeniń shekti mólsherin 1%-dan 0,3%-ǵa deıin tómendetý usynylady.

Sonymen birge jyldyq tıimdi stavkanyń shekti mólsherin 179% deńgeıinde belgileý usynylady.

Qarjy naryǵyn retteý jáne damytý agenttigi qarjy uıymdarynyń ádisnamasy jáne prýdentsıaldyq retteý departamentiniń dırektory Dáýren Sálimbaevtyń aıtýynsha, jalaqyǵa deıingi qaryzdar boıynsha paıyzdyq mólsherlemeler shamamen 3 ese tómendeıdi.

Buǵan deıin qysqa merzimdi mıkrokredıtterdiń jyldyq tıimdi syıaqy mólsherlemesi boıynsha esh shekteý bolmaǵan.

Mundaı qaryzdar boıynsha shekti nomınaldy mólsherleme belgilengen. 

Mysaly, 45 kúnde 20% mólsherlememen naqty jyldyq tıimdi mólsherleme 346% bolatyn. Táýligine 1% jáne 20% stavka kezinde 20 kún ishinde JES 2 600% asady. 

Budan basqa, qazirgi ýaqytta bankter men mıkroqarjy uıymdarynyń kepilsiz qaryzdary boıynsha jyldyq tıimdi syıaqy mólsherlemesi — 56%. Bul mólsher 2012 jyly belgilendi jáne sodan beri qaıta qaralmady.

Sondaı-aq, ázirlengen qaýly jobasy bankterdiń kepilsiz kredıtteri boıynsha shekti jyldyq mólsherlemeni 56%-dan 46%-ǵa deıin, kepildi kredıtter boıynsha 40%-dan 35%-ǵa deıin tómendetýdi kózdeıdi. 

«Kredıt stavkasynyń tómendeýi halyqtyń boryshtyq júktemesiniń tómendeýine yqpal etedi, ıaǵnı qazaqstandyqtar rásimdeıtin barlyq jańa qaryzdar anaǵurlym tómen mólsherlememen bolady jáne tıisinshe osy kredıtterge qyzmet kórsetý quny boryshtyq júkteme sııaqty tómen bolady», — dedi Dáýren Sálimbaev.