Qazaqstanda kreatıvti ındýstrııany qoldaý korporatıvtik qory qurylady

ALMATY. QazAqparat – Almatyda 1-5 qarasha kúnderi І Kreatıvti ındýstrııalar aptalyǵy ótedi. Forýmǵa bilim berý jáne kreatıvti habtar, Qazaqstan, Reseı, Belarýs, Qyrǵyzstan, Ózbekstan, Gollandııa, Italııa, Ulybrıtanııa elderiniń kreatıvti segment uıymdary qatysady, dep habarlaıdy QazAqparat tilshisi.

Búgin forýmnyń ashylý saltanatynda QR Mádenıet jáne sport vıtse-mınıstri Erjan Erkinbaev búgingi kúni elimizdiń ekonomıkalyq damýynyń basym baǵyttardyń biri retinde kreatıvti ekonomıkanyń damýyna erekshe kóńil bólinip jatqanyn aıtty.

«Byltyr Úkimet kreatıvti ındýstrııalardy damytý Tujyrymdamasyn qabyldady jáne qazirgi ýaqytta Tujyrymdama josparly túrde iske asyrylyp jatyr. Jaqyn arada, kreatıvti ındýstrııalar boıynsha quzyret bizdiń mınıstrlikke bekitiledi. Mádenıet jáne sport mınıstrligi atynan «Kazakh Tourism» ulttyq kompanııasy osy salany damytýmen aınalysady dep sheshildi. Sondyqtan sizderdiń ıdeıalaryńyzdy tyńdaý, jobalarmen tanysý jáne sizdermen birge salany damytýǵa kúsh salý biz úshin mańyzdy. Biz qazirgi kezde talanttar men kreatıvti ujymdardy qoldaý saıasatyn pysyqtap jatyrmyz.

Ol sondaı-aq aldaǵy ýaqytta Qazaqstanda kreatıvti ındýstrııany qoldaý korporatıvtik qory qurylatynyn málim etti.

«Qordyń kómegimen jas talanttar qoldaý taýyp, shyǵarmashylyǵyn damytatyn bolady. Qordyń fýnktsııalary talanttar men olardyń shyǵarmashylyq ónimderin anyqtaý, akseleratsııalaý jáne «eksportqa» daıyndaý bolady»,- dedi QR Mádenıet jáne sport vıtse-mınıstri Erjan Erkinbaev.