Qazaqstanda kózdi tekserý jáne kózildirikke tapsyrys berý baǵasy qansha
ASTANA. KAZINFORM - Qazaqstan qalalarynda kórý qabiletin tekserý baǵasy qoljetimdi. Alaıda kózildirik baǵasy týraly bulaı aıta almaımyz. Bir jaqsysy kóptegen optıka dúkeni kózildirik satyp alǵan jaǵdaıda kórý qabiletin tegin tekserýdi usynady, dep habarlaıdy Kazinform agenttiginiń tilshisi.
Baǵa qalaı qalyptasady
Kórý qabiletin tekserý qyzmetiniń baǵasy zertteýdiń túri men onyń kúrdeliligine qaraı esepteledi. Ádette mundaı qyzmettiń baǵasy asa qymbat emes. Al jekemenshik klınıkalar bolsa zamanaýı qural-jabdyqtarmen tekserý qyzmetin usynady. Bul sapaǵa áser etedi.
Keıbir «Optıka úıi» kózildirik satyp alsańyz tegin tekserý qyzmetin usynady.
Kózildiriktiń baǵasy onyń brendi men shyǵarylǵan eline de baılanysty. Ádette kózildirik jıektemesi men lınzalardyń baǵasy bólek esepteledi. Jıekteme baǵasy 70, 100, tipti 150 myń teńgege deıin jetýi múmkin. Keıbir lınzanyń baǵasy da osy qaraılas bolady. Nátıjesinde kózildirik jıyntyǵy aıtarlyqtaı qymbatqa túsýi múmkin. Degenmen adamdar qaltasyna qaraı tıimdi baǵada da satyp ala alady.
Sonymen qatar kóptegen dúken keshendi qyzmet toptamasyn usynady. Shamamen 10 myń teńgege kózdiń kórý qabiletin tekserip, kózildirik satyp alýǵa bolady.
Kórý qabiletin tekserý baǵasy
Kórý qabiletin tekserý baǵasy Túrkistan qalasynda arzan. Munda qyzmet quny 1 000 teńgeden bastalady. Odan keıin Astana qalasy tur. Mundaǵy baǵa 1 500 teńgeden bastalady. Aqtóbe men Petropavl qalalarynda tekserý baǵasy 2 000 jáne 2 200 teńgeden bastalady.
Óskemen, Qaraǵandy, Jezqazǵan jáne Taldyqorǵan qalalarynda baǵa 3 000 teńge jáne odan joǵary. Aıta ketý kerek, tekserý qyzmeti kóp ýaqyt almaıdy, alaıda aldyn ala jazylý qajet.
Shymkent, Semeı jáne Kókshetaý qalalarynda baǵa sál joǵary. Kórý qabiletin tekserý 4 000 teńgeden bastalady. Pavlodar, Qostanaı, Oral jáne Aqtaý qalalarynda qyzmet quny 5 000 teńgeden bastalyp tur. Keıbir qalalarda mundaı qyzmettiń túri kóp, al keıbirinde kerisinshe shekteýli.
Atyraý, Almaty jáne Taraz qalalarynda qyzmet baǵasy 6 000 teńgeden bastalady. Bul óńirlerdiń baǵasy ekinshi orynda tur. Al birinshi oryn Qyzylorda qalasyna tıesili. Munda baǵalar 10 000 teńgeden bastalady.
Kózildirik baǵasy
Kózildirik baǵasy Shymkent pen Qyzylorda qalalarynda tómen. Munda kózildirikti jıektemesi jáne lınzalarymen birge 7 000 teńgeden satyp alýǵa bolady. Odan keıin Qostanaı men Óskemen qalalary ornalasqan. Bul qalalarda baǵa 8 000 teńgeden bastalady. Aqtóbe men Oral qalalarynda 9 000 teńgeden, al Petropavl men Astana qalalarynda 10 000 teńgeden bastalady. Aqtaý men Atyraýda da shamamen osyndaı baǵa.
Túrkistan men Taldyqorǵanda kózildiriktiń eń tómen baǵasy 11 000 teńgeden bastalady. Pavlodarda 12 000 teńgeden, Taraz ben Almatyda 13 000 teńgeden satylady.
Kókshetaýda kózildirikti 14 000 teńgeden de satyp alýǵa bolady. Al eń qymbat qalalar — Semeı, Jezqazǵan jáne Qaraǵandy. Bul qalalarda kózildiriktiń baǵasy 15 000 teńgeden bastalady.
Buǵan deıin biz óńirlerdegi balalarǵa arnalǵan sport sektsııalarynyń baǵasyn salystyrǵan bolatynbyz.
Sondaı-aq aýyzashardyń qansha turatyny jáne Qazaqstanda akkýmýlıatordy qaı jerden arzanyna satyp alýǵa bolatyny týraly da jazǵan edik.
