Qazaqstanda qoı sharýashylyǵyn damytýdyń memlekettik baǵdarlamasyn qurý usynyldy
«Bizdiń osy depýtattyq saýalymyzǵa Qazaqstan Respýblıkasyndaǵy qoı sharýashylyǵyn damytýdyń jáne qoı eti men júnin óndirip, óńdeý máselesiniń áli de bolsa durys jolǵa qoıylmaı kele jatqandyǵy arqaý bolyp otyr. Sońǵy ýaqytta qoı eti men qoıdyń júnin eksporttaýda birshama ilgerileýshilik bolǵanymen, qoı sharýashylyǵyn damytý, qoı eti men júnin óndirý men óńdep, is qylý jaıy áli de syn kótermeıtin jaǵdaıda ekendigine Úkimettiń nazaryn aýdarǵandy jón sanap otyrmyz. Qoı ónimderin eksporttaýdy durys jolǵa qoıa almaı kele jatqandyǵymyz alańdatady. Aldaǵy ýaqytta Qazaqstandaǵy qoı sharýashylyǵyn damytýdyń jańa ári osy zamannyń talabyna beıimdelgen Memlekettik baǵdarlamasyn jasaý kerek dep sanaımyz. Qoı sharýashylyǵyn ıntensıvti damytýda jańa tehnologııalyq ádisterdi keńinen paıdalaný úshin salany básekelestik deńgeıine kóterý turǵysynda ǵylymmen birge óndiris jumystaryn júrgizý kerek», - dedi depýtat Ańsar Musahanov Senattyń jalpy otyrysynda.
Senatordyń atap ótýinshe, mal jaıylymdarynda degradatsııaǵa ushyraǵan, ıaǵnı jaramsyz bolyp qalǵan jaıylymdy jerlerdi qalpyna keltirý, jaıylym qunarlylyǵyn arttyrýǵa qajetti sharalar keshenin jasap, olardy júzege asyrýdy qolǵa alatyn kez keldi. Ol úshin shóp pen sekseýil tuqymdaryn óndirýdi de ǵylymı turǵydan jandandyrý qajet.
«Veterınarlyq qyzmettiń sheshilmeı kele jatqan kóptegen máselesi de bar. Aýyldyq okrýgter ortalyǵynan veterınarlyq pýnktter salý áli de mardymsyz. Qazirgi ýaqytta óndiriletin qoı ónimderi boıynsha qurylǵan Respýblıkadaǵy 4 birdeı palatany bir ortalyqqa, bir palataǵa ǵana biriktirý qajet. Sonymen birge qoı sharýashylyǵyna qatysty máselelerdi egjeı-tegjeıli talqylap, sheshý úshin Respýblıkalyq úılestirý keńesin qurǵannyń da artyqshylyǵy bolmas edi», - dedi A. Musahanov.
