Qazaqstanda kóterme saýda kólemi 3 trln teńgeden asty

ASTANA. KAZINFORM — 2026 jylǵy qańtarda Qazaqstandaǵy kóterme saýda kólemi 3048,5 mlrd teńgeni qurap, 2025 jylǵy sáıkes kezeń deńgeıinen 103,2%-dy kórsetti.

Ulttyq statıstıka bıýrosynyń dereginshe, kóterme taýar aınalymynda azyq-túlik emes taýarlar men óndiristik-tehnıkalyq ónimder basym, olardyń úlesi 79,5%-dy quraıdy. Óńirlik bóliniste eń iri úles Almaty qalasyna tıesili — 38,2%. Odan keıingi kórsetkishter: Astana qalasy — 16,9%, Atyraý oblysy — 12,4%, Qaraǵandy oblysy — 5,2%.

Bıylǵy qańtarda bólshek saýda kólemi 1 487,4 mlrd teńgeni qurap, ótken jyldyń sáıkes kezeńimen salystyrǵanda 2,1%-ǵa ósti. Saýda kásiporyndarynyń taýar ótkizýi 3,9%-ǵa artsa, dara kásipkerlerdiń, sonyń ishinde bazardaǵy satýshylardyń saýdasy 4,5%-ǵa tómendedi.

— Bólshek saýda qurylymynda jeke menshik kásiporyndardyń aınalymy 1 277,1 mlrd teńge nemese jalpy kólemniń 85,9%-yn, al sheteldik menshik nysanyndaǵy kásiporyndardyń úlesi 210,3 mlrd teńge nemese 14,1%-dy qurady, — delingen qujatta.

2026 jylǵy 1 aqpanǵa bólshek saýda kásiporyndarynyń taýar qorlary 1630,1 mlrd teńgeni qurap, saýda kúnderiniń sany 70-ke jetti. Azyq-túlik taýarlarynyń úlesi 28,9%, azyq-túlik emes taýarlar — 71,1%. 2025 jylǵy qańtarmen salystyrǵanda azyq-túlik taýarlaryn ótkizý 4,4%-ǵa, azyq-túlik emes taýarlardy ótkizý 1,3%-ǵa artty.

Eske sala keteıik, ótken jyly ishki saýda salasyn qoldaýǵa baǵyttalǵan keshendi memlekettik sharalar óz nátıjesin berdi. Ekinshi deńgeıli bankter arqyly nesıelerdi sýbsıdııalaý men kepildendirý tetikteri iske qosylyp, respýblıka boıynsha 460 joba qarjylandyryldy.