Qazaqstanda qosymsha qun salyǵyn baqylaıtyn arnaıy shot ashylady

ASTANA. QazAqparat - Qazaqstanda erikti negizdegi qosymsha qun salyǵyn baqylaý shotyn engizý josparlanýda, dep habarlaıdy «QazAqparat» HAA tilshisi.

Ulttyq ekonomıka mınıstrligi, bul qosymsha qun salyǵyndaǵy alaıaqtyqty túbegeıli joıatyndyǵyn, sonyń negizinde salyq tóleýshiler ózge alaıaqtar úshin artylǵan jaýapkershilikten bosatylatyndyǵyn alǵa tartýda.

«QQS-da birqatar alaıaqtyq shemalar bar. Bıýdjetten salyq tóleýshiler tólemegen QQS qaıtarylymyn jıi talap etedi. Aralyq taýar sońǵy bólshek satylymyna jetkenshe, QQS ózara jetkizýshiler arasynda aýdarylyp jatady. Jetkizýshiler bul QQS-ny joǵaltyp nemese jasyryp qalady jáne ári qaraı belgili bir shemalar paıda bolady. Sondyqtan tóleýshiden tóleýshige kóship júretin QQS-nyń arnaıy shotta kórinip turýy usynyldy. Sonda QQS qaıtarylymy áp sátte júzege asyrylady», - dedi Ulttyq ekonomıka birinshi vıtse-mınıstri Rýslan Dálenov jańa Salyq kodeksi jobasynyń tanystyrylymynda.

Kodeks jobasynda bul norma mindetti emes. Biraq qazirdiń ózinde birqatar salyq tóleýshiler men bankter muny erikti túrde jasaýǵa kelisip otyr.

"Máselen, áýejaı qyzmetteri, temir jol tasymaldary boıynsha túrli kompanııalar óz jetkizýshileri úshin arnaıy shot  ashýǵa kelisip otyr. Jetkizýshiler de qansha QQS túskenin salyq ókilderiniń baqylap otyrýy úshin QQS-nyń óz shottaryna emes, banktegi arnaıy shotqa aýdarylǵanyn durys dep esepteıdi», - dep tolyqtyrdy R. Dálenov.