Qazaqstanda qosymsha 28 seısmıkalyq stantsııa ornatylady

NUR-SULTAN. QazAqparat – Búginde elimizde seısmıkalyq qaýiptiń aldyn alý maqsatynda 63 seısmıkalyq stantsııa jumys istep tur. Aldaǵy ýaqytta taǵy 28 stantsııa ornatylmaq. Bul týraly QR Tótenshe jaǵdaılar mınıstri ıÝrıı Ilın málim etti, dep habarlaıdy QazAqparat tilshisi.

«Búginde elimiz boıynsha seısmıkalyq qaýipti aımaqtarda jer silkinisin boljaý jáne seısmıkalyq qaýip-qaterdi tómendetý maqsatynda 63 statsıonarlyq stantsııa jumys istep tur. Tsıfrlyq tehnologııalardy damytý aıasynda Almatyda jer silkinisin erte habarlaıtyn 9 avtomattandyrylǵan seısmostantsııa ornatyldy. Onyń kórsetkishin mobıldik qosymsha arqyly kórýge bolady. Bolashaqta taǵy 28 ctantsııa ornatý josparlanýda. Elimizdiń seısmıkalyq qaýipsizdigin qamtamasyz etý úshin 2023 jylǵa deıingi jol kartasy bekitilip, onyń aıasynda 20-dan astam is-shara qolǵa alynbaq», - dedi ıÝrıı Ilın OKQ-de ótken baspasóz máslıhatynda.

Mınıstrdiń aıtýynsha, bıyl 6 turǵyn úı, 37 densaýlyq saqtaý jáne 21 bilim berý nysany seısmıkalyq baqylaýdan ótti.

«Seısmıkalyq qubylystardyń táýlik boıǵy monıtorıngin seısmologııalyq tájirıbelik-ádistemelik ekspedıtsııa júrgizedi. Al jer silkinisi týraly boljaý men onyń kartasyn ázirleýdi Seısmologııa ınstıtýty júzege asyrady. Qazirgi ýaqytta Almaty qalasynda seısmıkalyq shaǵyn aýdandastyrý júrgizilip, Shyǵys Qazaqstan, Almaty jáne Jambyl oblystary men Óskemen qalasynyń seısmıkalyq kartasy ázirlendi. Sondaı-aq, bıyl qyrkúıekte azamattyq qorǵanys organdary kúshteri men quraldaryn daıyndaý maqsatynda Qyrǵyzstan men Ózbekstannyń shekara mańy elderiniń bólimshelerimen «JER-2021» halyqaralyq oqý-jattyǵýy ótkizildi», - deıdi ol.