Qazaqstanda qosymsha 15 áýejaı qalpyna keltiriledi
NUR-SULTAN. QazAqparat -2022 jylǵa deıin qosymsha 15 áýejaıdy qalpyna keltirý jumystary júrgiziledi. Bul týraly Parlament Senatynda kólik-logıstıkalyq qyzmetterdi damytýǵa arnalǵan dóńgelek ústel otyrysynda QR Indýstrııa jáne ınfraqurylymdyq damý vıtse-mınıstri Berik Kamalıev aıtty, dep habarlaıdy QazAqparat tilshisi.
«Jergilikti áýe jelileri men áýejaılary jaǵdaıyn jaqsartý mańyzdy. Búginde Qostanaı áýejaıyndaǵy ushý-qoný jolaǵyn jańartý jumystaryn júrgizýdemiz. 2020 jylǵa deıin elimizdiń barlyq áýejaılaryndaǵy ushý-qoný jolaqtaryn qaıta jóndeýden ótkizýdi aıaqtaý josparlanyp otyr», - dedi vıtse-mınıstr.
Onyń sózine qaraǵanda, qazirgi kezde jergilikti mańyzdaǵy Úrjar, Úsharal, Zaısan áýejaılary qyzmet kórsetýde. Baıanaýylda da ushý-qoný jolaǵyn jańartý jumystary aıaqtalýda.
«Bizde 500 mln teńge somasyndaǵy smetalyq qujatnamanyń tıptik jobasy bar. Osy oraıda jergilikti áýe jelilerin qalpyna keltirý úshin ony jergilikti ákimdikterge joldadyq. 2022 jylǵa deıin qosymsha 15 áýejaıdy qalpyna keltirýdi josparǵa engizdik», - dedi B. Kamalıev.
Budan buryn habarlanǵandaı, vıtse-mınıstr shildede Qazaqstannan Japonııaǵa jańa áýe reısi ashylatynyn málim etti.
