Qazaqstanda qosylǵan qun salyǵyn tsıfrlyq teńgemen tóleýge bolady
ASTANA. KAZINFORM – Bıyl 7 qazannan bastap eksportpen aınalysatyn kásipkerler qosylǵan qun salyǵyn tsıfrlyq teńgeniń kómegimen tóleı alady. Bul jańadan engizilgeli otyrǵan pılottyq joba jáne ol 2025 jyldyń sońyna deıin jalǵasady. Tolyǵyraq Qarjy mınıstrliginiń Memlekettik kirister komıteti aýdıt departamentiniń dırektory Qadyr Ismagýlov aıtyp berdi.
«Bizdiń komıtet Ulttyq bankpen birlese kele tsıfrlyq qosalqy qun salyǵy pılottyq jobasyn engizedi. Bul joba Memleket basshysynyń tapsyrmasy aıasynda júzege asyrylady. Maqsat – tsıfrlyq teńgeni paıdalana otyryp qosylǵan qun salyǵyn qaıtarý protsesin jetildirý, jeńildetý. Tsıfrlyq teńge – ulttyq valıýtamyzdy qoldanýdyń jańa túri, bizde qolma qol jáne qolma qolsyz valıýta bar. Bul jańashyldyqty salyqtyq ákimshilendirý salasynda qoldanǵaly otyrmyz. Osylaısha qosylǵan qun salyǵyn qaıtarý merzimin tekserýsiz 55-75 kúnnen 15 kúnge deıin qysqartýdy josparlap otyrmyz», - dedi Qadyr Ismagýlov agenttik tilshisine bergen suhbatynda.
Onyń aıtýynsha, tsıfrlyq teńgege kóshý eksportshylar men ınvestorlar úshin tıimdi.
«Ol úshin eksportshylar qarajatyn Ulttyq bankke tsıfrlyq teńgege aýystyrýy tıis jáne tańbalanady. Importtyq taýarlar boıynsha qosylǵan qun salyǵynyń ishine barlyq shyǵyn kiredi, al taýardy eksportqa jibergende onyń ishine qosylǵan qun salyǵy kirmeıdi, olar óz qarjysynan óteıdi, sondyqtan eksportshylarǵa QQS qaıtarylady. Jalpy pılottyq joba ınvestorlardyń qyzyǵýshylyǵyn arttyryp, eksportshylardyń jumysyn jetildirýde yqpaly basym, ıaǵnı eksportshylar qosylǵan qun salyǵyna tólegen tez qaıtaratyn bolsa, aınalymdary artyp, jumysy ónedi», - deıdi ol.
