Qazaqstanda kóshpeliler órkenıeti tarıhy týraly «History» telearnasy iske qosylady
ASTANA. QazAqparat - Qazaqstanda kóshpeliler órkenıeti tarıhy týraly «History» telearnasy iske qosylady. Bul týraly búgin Astanada«Jas Ulan» biryńǵaı balalar men jasóspirimder uıymynyń» birqatar start-ap jobalaryn tanystyrý kezinde «Z Industries LLP» kompanııasynyń bas dırektory Danııar Tebaev málim etti.
Aıta keteıik, bul kompanııa búginde atalǵan telearnany iske qosý jumystarymen aınalysyp jatyr.
Onyń aıtýynsha, telearnany qurý ıdeıasy úsh jyl buryn týyndady. «Biz elektrondy telearnamen habar taratý quqyǵyna lıtsenzııa aldyq. Ótken jyly osy baǵytta vıdeoportaldy quryp, bıyl ony jańǵyrttyq. Endi eki jyl boıy kontent jınaıtyn bolamyz. Qazirgi kezde Internet-telearna retinde habar taratýdamyz. 2017 jyly alty tilde sandyq arna retinde jumys istemekpiz»,-dedi D. Tebaev.
«QazAqparat» agenttigi tilshisine bergen suhbatynda kompanııa basshysy búginde Internet-kanal jańalyqtardy, muraǵat qujattaryn salyp jatqandyǵyn atap ótti. Belgili bolǵandaı, telearna bolashaqta barsha túrki memleketterine habar taratady. «Bastapqyda joba Qazaqstanda júzege asyrylady. Qazirgi kezde Túrkııa, Reseı, Ázerbaıjan tarapy bizdi qoldap otyr. Aldaǵy ýaqytta túrki elderinde tilshiler qosynyn ashatyn bolamyz»,-dedi ol.
