Qazaqstanda kóshpeli týrızm naryǵy 25 paıyzǵa tómendedi
ASTANA. QazAqparat - Sońǵy 2 jylda Qazaqstanda Túrkııaǵa týrıstik sapar jasaýǵa nıet tanytatyndardyń qatary 50 paıyzǵa tómendegendigi baıqalady. Bul jaıynda Ortalyq kommýnıkatsııalar qyzmetindegi brıfıngte QR Investıtsııaar jáne damý mınıstrligi Týrızm ındýstrııasy departamenti dırektorynyń orynbasary Temirǵalı Tyrmyshev málim etti, dep habarlaıdy QazAqparat.
«2014 jyly týrıstik fırmalar arqyly shamamen jarty mıllıon týrıst tirkelgen bolatyn. Sońǵy 2 jylda Túrkııa baǵytynda quldyraý 50 paıyz mólsherinde baıqalyp otyr. Kóshpeli týrızm naryǵyndaǵy quldyraý tolyqtaı alǵanda shamamen 20-25 paıyzdy quraıdy», - dedi Tyrmyshev.
Sonymen qatar taıaýda ǵana iske qosylǵan shetelde týrısterdiń quqyǵyna kepildik berý júıesiniń qalaı jumys isteıtindigin túsindirip berdi.
«Kóshpeli týrızm salasynda azamattarǵa kepildik berý júıesi týrıstik operatordyń kinásinen shetelde qıyn jaǵdaıǵa tap bolǵan bizdiń adamdarǵa shuǵyl elge jetkizýge baǵyttalǵan. Sonymen qatar týrıstik naryq sýbektileriniń jaýapkershiligin arttyrýdy da kózdeıdi. 2010 jyldan bastap jyl saıyn jazdyq maýsym kezinde týrıstik operatordyń bankrot bolýyna nemese qandaı da bir alaıaqtyq syzba saldarynan oryn alatyn jáıtter jıilep ketti. Aǵymdaǵy jyly «Týrıstik Qamqor» dep atalatyn aıryqsha qor engizildi, onyń qarjysy esebinen bizdiń azamattar shuǵyl elge jetkiziletin bolady», - dedi departament dırektorynyń orynbasary.
Onyń derekterine sáıkes, osy ýaqytqa deıin 12 myń adam zardap shegip, shyǵyn somasy ondaǵan mıllıonǵa jetken.
«Bul júıe halyqaralyq tájirıbe negizinde quryldy. Onyń negizine Ulybrıtanııa tájirıbesi alyndy, sonymen qatar skandınavııalyq, reseılik tájirıbeler de zerdelendi. Alymnyń qazirgi qoldanystaǵy stavkasymen shamamen 180 mln. jınaý josparlanýda. Biz atalǵan soma týrısterimizdi elge jetkizý úshin charterler qurýǵa jetkilikti bolady dep esepteımiz», - dedi ol.
«Týrıstik Qamqor» qorynyń tóraıymy Inna Reıdiń aıtýynsha, qor 7 qarashadan bastap jumys isteýde. Basty tetigi - týr-kod. Ol qyzmet usynyp otyrǵan týrıstik operatordyń qor tarapynan qorǵalǵandyǵyn bildiredi.
«Aǵymdaǵy jyldyń 7 qarashasynan bastap týrıstik kodsyz shyǵý zańsyz dep eseptelinedi. 40-tan astam týrıstik operator qordyń qatysýshysy sanalady, shamamen taǵy 25-i shartqa qol qoıý protsessinde. Jyldyń sońyna deıin barlyǵy da zańdy týrıstik operator bolýy qajet», - dedi Reı.
