Qazaqstanda Kóshe sporty federatsııasy quryldy
ASTANA. 23 jeltoqsan. QazAqparat - Qazaqstanda street workout jáne street lifting (kóshe sporty) boıynsha jańa federatsııa jumys jasaı bastady.
«QazAqparat» tilshisine bergen suhbatynda federatsııa vıtse-prezıdenti Islam Badýrgovtyń habarlaýynsha, uıym atalǵan sport túrin damytýmen aınalysyp qana qoımaı, jastar arasynda temeki shegý jáne alkogoldik ónimderge áýestenýdi aldyn alý jumystaryna belsendi aralaspaq. Qazaqstandyq federatsııa osy sport túri boıynsha tirkelgen álemde alǵashqy uıym bolyp tabylady
Street Workout - buqaralyq sport túrleriniń biri. Ol sport alańdaryndaǵy beltemirler, qyrly bórene, kóldeneń jáne tik satylar syndy sporttyq snarıadtarda túrli jattyǵýlardy qamtıdy.
«Biz árqashan salaýatty ómir saltyn úgitteıtin bolamyz. Street workout deneni shynyqtyrýǵa ǵana emes, sonymen qatar aqyl-oı órisin damytýǵa kómektesedi. Sondyqtan jastar arasynda tanymal bolyp barady. Sebebi bul sportpen kez kelgen adam shuǵyldana alady . Onymen aınalysý úshin fıtness-klýbtarǵa barýdyń qajeti joq, esik aldyndaǵy alańdarda sport jabdyqtary bolsa bolǵany. Sondaı-aq munda jaraqat alý qaýpi de óte az», - deıdi I.Badýrgov.
Onyń málimetteri boıynsha, Qazaqstanda kóshe sportyna 10-15 myńǵa jýyq jastar qatysady. Tanymaldyǵy jyl sanap artyp keledi. Ár oblystyń óz kóshbasshylary bar. Federatsııa aımaqtyq sport basqarmalaryna shyǵyp, jastarǵa osy sport túrin damytýǵa járdemdesý týraly usynyspen shyqpaq. Bolashaqta qalalyq chempıonattar men festıval ótkizý josparlanýda.
«Qazirgi ýaqytta Qazaqstan kóshe sporty boıynsha álem boıynsha 3-orynda keledi. Birinshi orynda - Ýkraına, ekinshisi - Reseı», - dep atap ótti I.Badýrgov.
Qazaqstannyń street workout boıynsha federatsııasynyń prezıdenti Ramazan Omarov bolyp saılandy.
