Qazaqstanda kórsetken qyzmetteri úshin eriktilerge eńbek ótili jazylady

ASTANA. QazAqparat - «Eriktiler qyzmeti týraly» jańa zań jobasynda eriktilerge eńbek ótilin jazý qarastyrylýda. Bul týraly QR Mádenıet jáne sport mınıstrligi Tilderdi damytý jáne qoǵamdyq-saıası jumys komıteti tóraǵasynyń orynbasary Vasılıı Porýbaımeh málim etti.

«Eriktiler qyzmeti tartymdy bolýy shart. Ol úshin erikti belgili bir mártebe ıe bolǵany dúrys. Erikti retinde qyzmet atqarǵan árbir adam mansabyn ary qaraı memlekettik qyzmette nemese basqa áleýmettik salada jumysqa ornalasa alatyndaı múmkindigi bolsa ıgi. Eriktilerde atqarǵan qyzmetine oraı eńbek ótili jazylýy qajet», - dep atap ótti ol.

Onyń aıtýynsha, «erikti» degen uǵym tek erikti túrde sharaǵa qatysý degen tar sheńberge jatqyzylmaýy kerek.

«Belgili bir sharaǵa kópshilikti jınaý kezinde memlekettik organdar olardy «erikti» dep ataýdan aýlaq bolýy kerek. Qazir qalaı? Paradqa adam jınaıdy da, «Eriktiler, kettik, qane» dep kúshtep alyp ketedi. Bul jaǵdaı eriktiler qozǵalysynyń damýyna edáýir nuqsan keltirip otyr. Árıne, barlyq memlekettik organǵa tyıym sala almaısyń. Degenmen aqparattyq jumys júrgizý kerek, osyny uǵyndyrý kerek. Osy másele jańa zańda naqty kórinis tapqan», - dep atap ótti V.Porýbaımeh.

Onyń málimetterine sáıkes, Qazaqstanda 109 eriktiler uıymy bar.