Qazaqstanda kórsetiletin proaktıv qyzmetter sany kóbeıedi

NUR-SULTAN. QazAqparat - Qazaqstanda belsendi kórsetiletin qyzmetter sanyn 17-ge jetkizý josparlanýda, dep habarlaıdy QazAqparat tsıfrlyq damý, ınnovatsııalar jáne aeroǵarysh ónerkásibi mınıstrligine silteme jasap.

Qazaqstanda «Tsıfrlyq Qazaqstan» memlekettik baǵdarlamasyn júzege asyrý aıasynda belsendi túrde kórsetiletin qyzmetter sanyn kóbeıtý josparlanyp otyr. Bul degenimiz, memleket azamatqa túrli ómirlik jaǵdaılarda memlekettik qyzmet kórsetýdi ózi usynady. Olardyń ishinde: mektepke qabyldaý, áleýmettik táýekelder jaǵdaılaryna tólemder taǵaıyndaý, jyljymaıtyn múlikti tirkeý jáne taǵy basqalar.

«Mundaı sheshim Asqar Jumaǵalıevtiń basshylyǵymen ótken memlekettik qyzmetterdi ońtaılandyrý jáne avtomattandyrý jónindegi vedomstvoaralyq komıssııanyń otyrystarynda qabyldandy. «Belsendi qyzmetter» sanyn kóbeıtý úshin qazir zańnamaǵa jáne Memlekettik qyzmet kórsetý standarttaryna ózgerister engizilýde. 17 túrli «belsendi qyzmetke» memlekettik qyzmettiń 27 túri toptastyrylady. Bul úderiske Eńbek jáne halyqty áleýmettik qorǵaý, Ádilet, Bilim jáne ǵylym, sondaı-aq Mádenıet jáne sport mınıstrlikteri tartylǵan. Sebebi, osy memlekettik organdardyń aqparattyq júıelerinde qyzmet kórsetýge qajetti derekter saqtalýda» delingen habarlamada.

Aıta ketý kerek, Qazaqstan – qyzmetterdi belsendi túrde kórsetetin TMD-daǵy alǵashqy jáne ázirshe jalǵyz el. Qazirgi ýaqytta 3 qyzmet túri pılottyq tártipte kórsetiledi. Olar - «Altyn alqa» jáne «Kúmis alqa» belgilerimen marapattalǵan kópbalaly analarǵa memlekettik járdemaqy taǵaıyndaý, memlekettik kepildik tóleý jáne bala týýdy tirkeý.

Mysaly, eger jas ana mobıldik azamattar bazasynda tirkelgen bolsa, sábıin dúnıege ákelgennen keıin oǵan SMS-habarlama keledi. SMS-habarlamaǵa jaýap bere otyryp, ol sábıdiń týý týraly kýáligin alýmen qatar, bala týýǵa oraı taǵaıyndalatyn áleýmettik járdemaqynyń 2 túrin resimdep, balany balabaqsha kezegine qoıyp, turǵylyqty mekenjaıyna tirkeı alady. Osy belsendi túrde kórsetiletin qyzmetti iske asyrý úshin memlekettik organdar tórt aqparattyq júıeni, atap aıtqanda «AHAJ», «ZTMO», elektrondyq úkimettiń aımaqtyq shlıýzin jáne halyqty qujattandyrý jáne tirkeý pýnktin ıntegratsııalady. Búgingi kúni 72 myńnan astam nárestege týý týraly kýálik belsendi qyzmet túri arqyly resimdeldi.