Qazaqstanda kórsetiletin fılmderdi qazaq tiline aýdarý mindettemesi ózgertildi

ASTANA. QazAqparat - Mádenıet jáne sport mınıstrligi Parlament qaraýynda jatqan «Kınematografııa týraly» zań jobasynda fılmderdi qazaq tiline dýblıajaý mindettemesine ózgeris engizdi, dep habarlaıdy QazAqparat tilshisi.

Aıta keteıik, qoldanystaǵy 2006 jylǵy 15 jeltoqsandaǵy QR Mádenıet týraly zańynyń 28-4 babynda «Shetel telearnalarynan retranslıatsııalanǵan fılmderdi qospaǵanda, prokattaý maqsatynda QR aýmaǵyna ákelinetin barlyq fılmderge qazaq tilinde dýblıaj jasalýy tıis» dep kórsetilgen.

«Ózderińizge málim, Mádenıet týraly zańda kórsetilgen Qazaqstan aýmaǵynda barlyq fılmder qazaq tilinde dýblıajdalýy tıis degen norma jumys istemeıdi. Bul normany biz ózgertip otyrmyz. Qazaqstanǵa ortasha eseppen alǵanda, jalpy 300-ge jýyq fılm jetkziledi, olardyń basym bóligi - mańyzy zor, tárbıeleýge baǵyttalǵan, ıntellektýaldy nemese áleýmettik mańyzy bar fılmder qataryna jatpaıtyn sheteldik fılmder. Sondyqtan olardy mindetti dýblıajdaý búgingi kúnge qajet emes», - dedi MSM Zań qyzmeti departamentiniń dırektory Kúmis Seıitova Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, atalǵan normaǵa balama retinde qazaq tilinde sýbtıtrlaý nemese kadrdan tys aýdarma qosylady.

«Nátıjesinde, zań jobasy aıasynda Qazaqstanda shyǵarylǵan nemese QR aýmaǵynda prokattaý maqsatymen ákelingen fılmderdi qazaq tiline dýblıajdaý nemese sýbtıtrleý nemese kadrdan tys aýdarý qajettigi qarastyrylyp otyr. Bul barlyq jaǵynan tıimdi norma dep esepteımiz», - dep óz sózin túıindedi K. Seıitova.

Foto: top-master.biz