Qazaqstanda koronavırýstyń órshýi qaıtalanýy múmkin be
NUR-SULTAN. QazAqparat – QR Densaýlyq saqtaý vıtse-mınıstri, bas memlekettik sanıtarlyq dáriger Erlan Qııasov koronavırýstyń órshýiniń aldyn alý úshin tıisti jumystar atqarylǵanyn aıtty, dep habarlaıdy QazAqparat tilshisi.
«Budan buryn pesımıstik esepteýler boıynsha indettiń órshý múmkindigi naýryzdyń sońy men sáýirdiń basyna qarastyrylǵan edi. Alaıda qazirgi jaǵdaıda eskere otyryp, osyǵan deıin belgilengen qaýip seıilgenin baıqaýǵa bolady. Qazirgi kezde jaǵdaı optımıstik stsenarıı boıynsha qalyptasyp keledi», - dedi E. Qııasov Ortalyq kommýnıkatsııalar qyzmetinde.
Sonymen qatar ol byltyrǵy jaz aılaryndaǵydaı indettiń órshýi bolmaýy úshin tıisti jumystar atqarylǵanyn jetkizdi.
«Koronavırýs ınfektsııasynyń taralýyn shekteýge baǵyttalǵan qadamdar tıisti oń nátıjesin berdi dep úmittenemiz. Sondyqtan ótken jyldaǵy ahýal qaıtalanbaıdy dep sanaımyz», - dedi vıtse-mınıstr.
Budan buryn habarlanǵandaı, baspasóz máslıhatynda QR Densaýlyq saqtaý vıtse-mınıstri, bas memlekettik sanıtarlyq dáriger Erlan Qııasov koronavırýsqa qarsy vaktsınalaý naýqanyna qatysty túsinik berdi.
Koronavırýs ınfektsııasyna qarsy vaktsınalaý jalǵasyp jatyr. Qazirgi kezde birinshi komponentpen 20 157 adam egildi. 22 aqpannan bastap ekinshi komponentpen vaktsınalaý bastalyp, 2 137 adamǵa ekpe jasaldy, qolaısyz kórinister tirkelgen joq.
Munymen qosa ol Úkimet múshelerine qaı vaktsına salynatynyn aıtty.
