Qazaqstanda koronavırýstyń «brıtandyq» shtamy tirkelgen joq

NUR-SULTAN. QazAqparat – QR DSM Medıtsınalyq jáne farmatsevtıkalyq baqylaý komıteti Dárilik zattar men medıtsınalyq buıymdardy saraptaý ulttyq ortalyǵy sarapshysy Nurshaı Ázimbaeva elimizde koronavırýstyń «brıtandyq» shtamy tirkelmegenin aıtty, dep habarlaıdy QazAqparat tilshisi.

Ortalyq kommýnıkatsııalar qyzmetinde koronavırýs ınfektsııasynyń «brıtandyq» shtamyna qatysty suraq qoıyldy.

«Álem boıynsha koronavırýs ınfektsııasy shtamdaryn, olardyń mýtatsııasyn zerttep, qadaǵalap otyrmyz. Elimiz boıynsha ulttyq saraptama ortalyǵy bar. Ortalyq elde tirkelgen koronavırýs ınfektsııasynyń shtamdaryn qarap, tekseredi. Osynyń nátıjesinde, «brıtandyq» shatamm elimizdiń aýmaǵynda tirkelmedi», - dedi N. Ázimbaeva.

Sonymen bul baǵyttaǵy jumystar jalǵasyp jatqanyn aıtty.

Budan buryn habarlanǵandaı, baspasóz máslıhatynda QR Densaýlyq saqtaý vıtse-mınıstri, bas memlekettik sanıtarlyq dáriger Erlan Qııasov koronavırýsqa qarsy vaktsınalaý naýqanyna qatysty túsinik berdi.

Koronavırýs ınfektsııasyna qarsy vaktsınatsııalaý jalǵasyp jatyr. Qazirgi kezde birinshi komponentpen 20 157 adam egildi. 22 aqpannan bastap ekinshi komponentpen vaktsınalaý bastalyp, 2 137 adamǵa ekpe jasaldy, qolaısyz kórinister tirkelgen joq.

Sonymen qatar Qazaqstanda 65 jastan asqan adamdardy vaktsınatsııalaýǵa ruqsat etildi.