Qazaqstanda koronavırýstyń aldyn alý sharalary qalaı júrgizilip jatyr
Mınıstrlik málimetinshe, elimizde koronavırýsqa qatysty sarapshylardan quralǵan respýblıkalyq shtab quryldy.
Sonymen birge, koronavırýs ınfektsııasyn aldyn alýdyń ulttyq josparynyń jobasy ázirlendi.
Qazirgi kezde densaýlyq saqtaý basqarmalarynda patsıenttter kelip túsken jaǵdaıda onda ınfektsııalyq statsıonarlardy daıyndaý jáne olardy tıisti dári-dármekpen qamtamasyz etý sharalary júrgizilýde.
Medıtsınalyq mamandardy teorııalyq jáne praktıkalyq (trenıng, oqý) daıyndyǵy pysyqtalyp, tekserildi.
Medıtsınalyq uıymdardy úzbeı qamtamasyz etýge tıisti dárilik-dármekterdiń tizbesi ázirlendi.
Densaýlyq saqtaý mınıstri Eljan Birtanov Qoǵamdyq densaýlyq saqtaý ulttyq ortalyǵyna baryp, jalpy jaǵdaımen tanysty.
Buǵan qosa, memlekettik shekaradan ótkizý beketterinde, onyń ishinde áýe, avtokólik jáne temirjol kóligi nysandarynda sanıtarlyq-epıdemıologııalyq jáne kóshi-qon baqylaýyn kúsheıtý sharalary qolǵa alynýda.
Sonymen qatar, Qazaqstanda koronavırýsqa baılanysty jedel jeli iske qosyldy.
Koronavırýstyń alǵashqy belgileri – bastyń aýrýy, tumaý, keýdedegi aýyrlyq, ókpeniń qabynýy, qyzýdyń kóterilýi, júrek qaǵysynyń jıileýi, demniń jedeldeýi.
«Mundaı jaǵdaıda em sharasyn ózdigimen qabyldamaı, birden 103 nómirine habarlasý kerek!» - dep eskertedi mınıstrlik.
Eske salsaq, QR Prezıdenti Qasym-Jomart Toqaev Qytaıdan Qazaqstan aýmaǵyna koronavırýstyń taralýyna jol bermeý boıynsha naqty uıymdastyrý sharalaryn qabyldaýdy tapsyrǵan bolatyn.
26 qańtarda QR Premer-Mınıstri Asqar Mamın Qazaqstan aýmaǵynda koronavırýstyń taraýyna jol bermeý jáne onyń aldyn alý sharalary jóninde keńes ótkizdi.
Keńes qorytyndysy boıynsha Úkimet basshysy kelesi keshendi aldyn alý sharalaryn qabyldaýdy tapsyrdy.
Úkimet basshysynyń orynbasary Berdibek Saparbaevtyń tóraǵalyǵymen vedomstvoaralyq komıssııa quryldy.
Qazir Qytaıda pnevmonııalyq ınfektsııanyń jańa túri tarap jatyr .
Syrqatqa shaldyqqan jáne kóz jumǵandar sany kún sanap artyp keledi. Alǵashqy naýqastar tirkelgen kúnderi (15 qańtar) esepke 41 adam alynǵan bolatyn.
Pnevmonııanyń bul túri Taıland, Eýropa elderi men AQSh-ta tirkelip otyr.
Qazaqstan koronavırýsty zerthanalyq jaǵdaıda anyqtaýǵa múmkindik beretin praımerlerdi satyp alýdy bastady.
QR Densaýlyq saqtaý mınıstrligi elimizde ınfektsııa tirkelmegenin resmı málim etti.
QR Syrtqy ister mınıstrliginiń aqparatynsha, karantınge jabylǵan Qytaıdyń Ýhan qalasynda búginde Qazaqstannan 230 stýdent oqıdy. Olardyń 98-i ǵana qalada qalyp otyr. Qalǵandary demalystyń bastalýyna baılanysty Qazaqstanǵa jáne basqa da elderge ketip qalǵan.
Elimiz óńirlerindegi barlyq áýejaılarda profılaktıkalyq sharalar jáne oqý-jattyǵý jumystary júrgizilýde.