Qazaqstanda koronavırýsty qaıta juqtyrý jaǵdaıy tirkelgen joq

NUR-SULTAN. QazAqparat – Álemdik ǵalymdar koronavırýspen aýyryp, jazylyp shyqqan adamnyń boıynda ımmýnıtet qanshalyqty uzaqqa shydaıtynyn bilmeıdi. Bul týraly Densaýlyq saqtaý vıtse-mınıstri Ajar Ǵınııat aıtty, dep habarlaıdy QazAqparat tilshisi.

Vıtse-mınıstrdiń aıtýynsha Qazaqstanda qazirgi tańda koronavırýsty qaıta juqtyrý jaǵdaıy tirkelmegen.

«Adamdar koronavırýstyń aýyr túrimen aýyryp, qaıtadan analız tapsyrǵan kezde testtiń teris nátıje kórsetkeni, sodan birshama ýaqyttan keıin qaıtadan test oń nátıje kórsetken jaǵdaıy tirkelgen. Alaıda mundaı jaǵdaıda bizdiń mamandar bastapqy vırýstyń aǵzadan tolyq ketpeýi dep túsindirdi. Analız klınıkalyq belgisi bolmaǵan sıpatta oń nátıje kórsetedi. Sol sebepti bul – qaıtadan juqtyrý jaǵdaıy retinde eseptelmeıdi. Qazaqstanda qazirgi tańda koronavırýsty qaıta juqtyrý jaǵdaıy tirkelgen joq», - dedi Ajar Ǵınııat OKQ-da ótken baspasóz máslıhatynda.

Vıtse-mınıstr búkil álemniń ǵalymdary aýyryp bolǵan adamnyń boıyndaǵy ımmýnıtettiń qanshalyqty shydaıtynyn zerttep jatyr.

«Ýaqytsha, ıaǵnı 6 aptalyq ımmýnıtettiń qalyptasatyny jaıly málimet bar. Alaıda bul rette de naqty jaýap joq. Sebebi bul aýrýdyń ótý aǵymyna baılanysty. Adam qandaı jaǵdaıda aýrýǵa qarsy turatyndyǵy týraly ǵalymdarda naqty bir ortaq tujyrym joq», - dedi Ajar Ǵınııat.