Qazaqstanda koronavırýsty emdeý taktıkasynyń ózindik ereksheligi bar – Reseı dárigeri
ATYRAÝ. QazAqparat – Atyraýǵa Reseıdiń Astrahan oblysynan kelgen 5 dáriger naýqastardy emdeýge kiristi, dep habarlaıdy QazAqparat.
«Qazaqstan bizge eń jaqsy jaǵdaıdy jasady. Biz óte rızamyz» deıdi astrahandyq dárigerler tobynyń jetekshisi Anna Chepel.Ol bul pikirin caspian-eurasia.com saıtyna bildirgen.
Ótken aptada Atyraý oblysynyń ákimi Mahambet Dosmuhambetovtiń Reseıdegi Astrahan oblysynyń gýbernatory Igor Babýshkınmen aradaǵy kelisimine sáıkes 5 dáriger kelgen bolatyn.
Qazir astrahandyq dárigerler úsh topqa bólingen. Olar oblystyq, ınfektsııalyq aýrýhanalar men kardıologııalyq ortalyqta jasaqtalǵan gospıtalde jumys isteýde.
«Bizdi úsh topqa bóldi. Eki topta ekeýden, al bir topta bir dáriger bar. Keshe «qyzyl» aımaqqa kirdik. Ár dárigerdiń óz bólimshesi bar. Emdeý taktıkasynyń ózindik ereksheligi bar. Biraq, aıtarlyqtaı kóp emes. Jumys kóp. Biraq, qazaqstandyq áriptestermen úılesimdi jumystyń nátıjesinde bári de rettelip jatyr», - deıdi Anna Chepel.
Onyń aıtýynsha, astrahandyq dárigerler kúnine jergilikti standart boıynsha 6 saǵat jumys isteıdi. Dárigerler naýqastardy tekserip, em júrgizedi.
«Qazaqstanda bizge tamaqpen, jatyn orynmen qamtýda baǵytynda eń jaqsy jaǵdaı jasaldy. Biz óte rızamyz» deıdi dáriger Anna Chepel.
Eske sala ketelik, budan buryn Atyraýǵa Reseıdiń Astrahan oblysynan 5 dáriger kelgenin habarlaǵan edik.
