Qazaqstanda koronavırýstan jazylǵan patsıentter ońaltý sharalarynan ótedi

NUR-SULTAN. QazAqparat – Qazaqstanda koronavırýs pen pnevmonııadan jazylǵan patsıentterdi ońaltý boıynsha baǵdarlama iske qosylady. Bul týraly Densaýlyq saqtaý mınıstri Alekseı Tsoı málim etti, dep habarlaıdy QazAqparat tilshisi.

«Qazir bizde birqatar baǵdarlama ázirlenip jatyr. Tamyz aıynyń basynda tarıfterdi bekitip, atalǵan qyzmetti iske qospaqpyz. Ol birneshe kezeńnen turatyn bolady», - dedi Alekseı Tsoı OKQ-da ótken baspasóz máslıhatynda.

Onyń aıtýynsha, baǵdarlamanyń alǵashqy kezeńi emhana deńgeıinde bastalady.

«Ekinshi kezeń statsıonar deńgeıinde júrgiziledi. Ol jerde patsıentter ońaltý boıynsha kómek ala alady», - dedi mınıstr.

Mınıstr baǵdarlama mindetti áleýmettik medıtsınalyq saqtandyrý qory esebinen qarjylandyrylatynyn jetkizdi.

«Ol boıynsha tólem Mindetti áleýmettik medıtsınalyq saqtandyrý qorynan júrgiziledi. Eń mańyzdysy, aýrýdyń aýyrlyq dárejesi boıynsha naqty talaptary, ıaǵnı patsıentter ońaltýdyń qandaı túrin alatyny aıqyndaldy. Aýrýdy ótkerý deńgeıine qaraı naqty ońaltý baǵdarlamasy belgilenedi», - dedi Alekseı Tsoı.