Qazaqstanda koronavırýspen kúreske qansha qarjy baǵyttaldy

NUR-SULTAN. QazAqparat – «Habar 24» telearnasynda ótken brıfıngide QR Aqparat jáne qoǵamdyq damý mınıstri Dáýren Abaev koronavırýspen kúreske qansha qarjy jumsalatyny jáne qandaı maqsatqa baǵyttalǵanyn túsindirdi, dep habarlaıdy QazAqparat tilshisi.

Koronavırýspen kúreske tikeleı bólingen qarjy málimetine toqtalǵan mınıstr, «bul turǵyda Prezıdent jarııalaǵan daǵdarysqa qarsy sharlarǵa qatysty emes. Koronavırýsqa qarsy kúres sharalaryna qarjy Úkimet rezervinen úsh ret bólindi», - dedi.

Osy oraıda 29 qańtardaǵy birinshi transh aıasynda 1 mlrd 609 mln teńge, 21 aqpanda qosymsha 428 mln 227 myń teńge bólindi. Sondaı-aq úshinshi ret 25 naýryzda 21 mlrd 430 mln teńge baǵyttaldy.

Bul qarjy dárilik zattardy, medıtsınalyq jabdyqtar men zerthanalyq quraldardy alýǵa, sonymen qatar medıtsınalyq maska men qolǵap, qorǵanys kıimderi men testilerge bólindi.

Munymen qosa, bul shyǵyndar azamattardy evakýatsııalaýǵa, shuǵyl medıtsınalyq kómekke, dezınfektsııa zattaryn alýǵa jáne basqa da qajetti sharalarǵa negizdeldi.

«Koronavırýspen kúreske jumyldyrylǵan medıtsınalyq qyzmetkerlerge ústeme tólem jasaý maqsatynda bıýdjetti naqtylaýǵa ótinim jeke engizildi», - dedi D. Abaev.

Budan buryn habarlanǵandaı, QR Aqparat jáne qoǵamdyq damý mınıstri indetpen kúres kezeńinde eriktilerdiń qosqan úlesi týraly aıtty.