Qazaqstanda koronavırýsqa táýligine 70 myń testileý júrgiziledi

NUR-SULTAN. QazAqparat – Búginge deıin Qazaqstanda koronavırýs ınfektsııasyna qatysty 3 mln 655 testileý júrgizildi. Bul týraly QR Densaýlyq saqtaý mınıstrligi Sanıtarlyq-epıdemıologııalyq baqylaý komıtetiniń tóraıymy Aıjan Esmaǵambetova málim etti, dep habarlaıdy QazAqparat tilshisi.

«Esterińizde bolsa, shilde aıynda Qazaqstanda testileý deńgeıi táýligine 40 myńnan sál astam bolatyn. Qazirgi kezde bul kórsetkish táýligine 70 myńǵa jetkizildi. Júrgizilgen testileý kólemi epıdemıologııalyq jaǵdaıdy eskere otyryp artyp keledi», - dedi ol Ortalyq kommýnıkatsııalar qyzmetinde.

Onyń sózine qaraǵanda, ótken aptada el boıynsha testileý sanynyń 10 paıyzǵa óskeni baıqaldy. Al keıbir óńirlerde bul kórsetkish eselep artty.

«Soltústik Qazaqstan oblysynda testileý úsh esege, Shyǵys Qazaqstan oblysynda eki esege, Almaty oblysynda 2,4 esege, Aqmola oblysynda 1,6 esege ósti. Sonymen qatar, qalǵan óńirlerde de testileý deńgeıi artyp keledi», - dedi komıtet basshysy.

Budan buryn habarlanǵandaı, QR Densaýlyq saqtaý vıtse-mınıstri Ajar Ǵınııat koronavırýspen syrqattanýdyń ósýi barlyq óńirlerde baıqalǵanyn aıtty.