Qazaqstanda koronavırýsqa shaldyqqan 310 adamnyń jaǵdaıy aýyr
«Osy jyldyń basynan beri respýblıka boıynsha densaýlyq jaǵdaıy aýyr patsıentterdiń sany edáýir tómendegeni baıqalady. Sonymen qatar, jekelegen óńirlerde aýyr naýqastardyń sany aldyńǵy aımen salystyrǵanda ósip keledi. Ol: Atyraý, Qaraǵandy, Pavlodar oblystarynda, Nur-Sultan, Almaty qalalarynda. 3 aqpandaǵy jaǵdaı boıynsha respýblıkada koronavırýs ınfektsııasy bar jaǵdaıy aýyr naýqastardyń sany – 310 adam. Jaǵdaıy óte aýyry - 57. Jasandy tynys alý apparatynda 52 patsıent bar», - dedi vıtse-mınıstr Ortalyq kommýnıkatsııalar qyzmetindegi baspasóz máslıhaty barysynda.
Onyń dereginshe, patsıentterdiń 64 paıyzy koronavırýstyń oń dıagnozy bar naýqastar. Táýligine reanımatsııaǵa 30-dan 50-ge deıin naýqas túsedi. Reanımatsııa bólimshesindegi aýrýlardy taldaý kezinde patsıentterdiń 70 paıyzǵa jýyǵynda qant dıabeti, arterııalyq gıpertenzııa, ókpeniń obstrýktıvtik aýrýy, semizdik, baýyr tsırrozy jáne onkologııalyq aýrýlar sııaqty júrek-qan tamyrlary júıesiniń sozylmaly aýrýlary bar ekenin kórsetip otyr.
«Osy patsıentterdiń 66 paıyzy alǵashqy táýlikte aýyr kúıde túsip jatyr. Bul kóbinese úıde óz betinshe emdelý áreketinen keıin medıtsınalyq kómekke kesh júginýdi bildiretinin aıta ketý kerek. Ýchaskelerde COVID-19 sımptomsyz, jeńil nysany bar naýqastardy ambýlatorııalyq baqylaýdyń chek-paraqtary, COVID-19 bar balanyń jaǵdaıyn baqylaý boıynsha ata-analarǵa arnalǵan chek-paraqtar júrgizilýi tıis», - dedi Ajar Ǵınııat.